ലാഹോര്‍: കളി ആരംഭിക്കാന്‍ മണിക്കൂറുകള്‍ മാത്രമുള്ളപ്പോള്‍ പര്യടനം ഉപേക്ഷിച്ച ന്യൂസിലാന്‍ഡ് തീരുമാനം വിവാദമായിരുന്നു. പാകിസ്ഥാന്‍ ക്രിക്കറ്റ് ഇതിനെതിരെ ശക്തമായി പ്രതികരിച്ചു. എന്നാലിപ്പോള്‍ ന്യൂസിലാന്‍ഡ് ടീമിന് സുരക്ഷ ഒരുക്കിയ ഉദ്യോഗസ്ഥര്‍ കഴിച്ച ബിരിയാണി കണക്കാണ് ഇപ്പോള്‍ കൗതുകമാവുന്നത്. 

ന്യൂസിലാന്‍ഡിന്റെ പിന്മാറ്റം തങ്ങള്‍ക്ക് വലിയ സാമ്പത്തിക നഷ്ടം സൃഷ്ടിച്ചതായി പാകിസ്ഥാന്‍ ക്രിക്കറ്റ് ബോര്‍ഡ് പറഞ്ഞിരുന്നു. ഇതിന് ഇടയിലാണ് ന്യൂസിലാന്‍ഡ് ടീമിന് സുരക്ഷ ഒരുക്കിയ സുരക്ഷ ഏജന്‍സി ഉദ്യോഗസ്ഥര്‍ ബിരിയാണി കഴിച്ചതിന്റെ കണക്കും പുറത്ത് വരുന്നത്. 

സന്ദര്‍ശക ടീമിന്റെ സുരക്ഷാ ചുമതല ഉണ്ടായിരുന്ന ഉദ്യോഗസ്ഥര്‍ കഴിച്ച ബിരിയാണിയുടെ ബില്‍ 27 ലക്ഷം എന്നതാണ് പാക് ക്രിക്കറ്റ് ബോര്‍ഡിനെ ഞെട്ടിക്കുന്നത്. 5 എസ്പി, 500 എസ്എസ് പികളെയാണ് കിവീസ് ടീമിന്റെ സുരക്ഷയ്ക്കായി വിന്യസിച്ചിരുന്നത്. പാകിസ്ഥാന്‍ സൈന്യവും സുരക്ഷ ഒരുക്കിയിരുന്നു. 

ഇവര്‍ക്കെല്ലാം ഒരു ദിവസം രണ്ട് നേരമാണ് ബിരിയാണി നല്‍കിയിരുന്നത്. ഇതിനാണ് 27 ലക്ഷം രൂപയുടെ ബില്‍ വന്നിരിക്കുന്നതെന്ന് പാക് മാധ്യമങ്ങള്‍ റിപ്പോര്‍ട്ട് ചെയ്യുന്നു. 18 വര്‍ഷത്തിന് ശേഷമാണ് പാകിസ്ഥാനിലേക്ക് കളിക്കാനായി ന്യൂസിലാന്‍ഡ് എത്തിയത്. മൂന്ന് ഏകദിനവും മൂന്ന് ട്വന്റി20യുമാണ് കളിക്കേണ്ടിയിരുന്നത്. എന്നാല്‍ സുരക്ഷാ ഭീഷണി ചൂണ്ടിക്കാണിച്ച് ന്യൂസിലാന്‍ഡ് അപ്രതീക്ഷിതമായി പിന്മാറി.