ദുബൈ: ടി20 ലോകകപ്പിൽ പങ്കെടുക്കുന്നതുമായി ബന്ധപ്പെട്ട തീരുമാനം തിങ്കളാഴ്ച (ഫെബ്രുവരി 2) പ്രഖ്യാപിക്കുമെന്ന് പി സി ബി ചെയർമാൻ മുഹ്‌സിന്‍ നഖ്‌വി. വെള്ളിയാഴ്ച ഇത് സംബന്ധിച്ച തീരുമാനം അറിയിക്കുമെന്നായിരുന്നു ആദ്യം അറിയിച്ചത്. എന്നാൽ പാകിസ്ഥാന്റെ ഭാഗത്ത് നിന്ന് യാതൊരു പ്രതികരണവും ഉണ്ടായിരുന്നില്ല.

പാകിസ്ഥാൻ പ്രധാനമന്ത്രി ഷഹ്ബാസ് ഷെരീഫുമായി പി സി ബി അധികൃതർ കഴിഞ്ഞ ദിവസം ചർച്ച നടത്തിയിരുന്നു. ഈ ചർച്ചയ്ക്ക് ശേഷം പാകിസ്ഥാൻ പങ്കെടുക്കുന്നതുമായി ബന്ധപ്പെട്ട തീരുമാനം ഫെബ്രുവരി 2 ന് (തിങ്കളാഴ്ച) അറിയിക്കാമെന്ന് പി സി ബി അധികൃതർ വ്യക്തമാക്കി.

ഐ സി സിയുമായി നല്ല ബന്ധം നിലനിർ‍ത്തേണ്ടതിന്റെ ആവശ്യകതയെക്കുറിച്ച് പ്രധാനമന്ത്രി ഷഹ്ബാസ് ഷെരീഫിന് പ്രത്യേക റിപ്പോർട്ട് കഴിഞ്ഞ ദിവസത്തെ യോഗത്തിൽ പി സി ബി നൽകിയെന്നാണ് വിവരം.

അതേസമയം, പാകിസ്ഥാൻ ക്യാപറ്റൻ സൽമാൻ അലി ആഘയുടെ നേതൃത്വത്തിലുള്ള സംഘം കൊളംബോയിലേക്കുള്ള യാത്രക്കായി വിമാന ടിക്കറ്റ് ബുക്കിങ് ചെയ്തിട്ടുണ്ട്. മത്സരം ബഹിഷ്ക്കരിച്ചാൽ ഐ സി സിയുടെ കടുത്ത നടപടികൾ ഉണ്ടാകുമെന്നത് കൊണ്ട് തന്നെ ടൂർണമെന്റിൽ നിന്ന് പാകിസ്ഥാൻ പിന്മാറില്ലെന്നാണ് റിപ്പോർട്ടുകൾ.