ലോക്‌സഭ തെരഞ്ഞെടുപ്പ് നിയമ വിരുദ്ധമെന്ന് രാഹുല്‍, റാലി ഫ്ലോപ്പെന്ന് ബിജെപി, കെഎസ്‌യു പ്രവര്‍ത്തകര്‍ക്ക് ക്ലീന്‍ ചിറ്റ്; ഇന്നത്തെ 5 പ്രധാന വാര്‍ത്തകള്‍

മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനും എസ്‌ഐആര്‍ നടപടികള്‍ക്കുമെതിരെ പ്രതിപക്ഷ ഇന്ത്യ മുന്നണി നടത്തിയ റാലിയില്‍ പ്രമുഖ നേതാക്കളുള്‍പ്പെടെ വന്‍ ജനാവലി പങ്കെടുത്തു. ഗ്യാനേഷ് കുമാറിന് രാജിവച്ച് ജയിലില്‍ പോകേണ്ടിവരുമെന്ന് പ്രതിപക്ഷ നേതാവ് രാഹുല്‍ ഗാന്ധി പറഞ്ഞു. എന്നാല്‍ റാലി ഫ്‌ലോപ് ഷോ ആണെന്നും മൈതാനം കാലിയായിരുന്നെന്നും വിമര്‍ശിച്ച് ബിജെപി രംഗത്തെത്തി. മുന്‍ മന്ത്രി വീണ ജോര്‍ജിനെ ആക്രമിച്ചെന്ന കേസില്‍ കെഎസ്.യു പ്രവര്‍ത്തകര്‍ക്ക് ക്ലീന്‍ ചിറ്റ്. ഇന്നത്തെ അഞ്ച് പ്രധാന വാര്‍ത്തകളറിയാം

2024ലെ ലോക്സഭാ തെരഞ്ഞെടുപ്പ് നിയമവിരുദ്ധമാണെന്നും മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാര്‍ പദവിയില്‍ നിന്ന് പുറത്താക്കപ്പെട്ട് ജയിലില്‍ പോകുമെന്നും ലോക്സഭാ പ്രതിപക്ഷ നേതാവ് രാഹുല്‍ ഗാന്ധി. ഇലക്ട്രോണിക് വോട്ടിംഗ് മെഷീനുകളിലൂടെയും (ഇവിഎം) വോട്ടര്‍ പട്ടികയില്‍ കൃത്രിമം കാട്ടിയും വോട്ടുകള്‍ മോഷ്ടിച്ചുവെന്ന് ആരോപിച്ച രാഹുല്‍, വോട്ട് മോഷണം രാജ്യദ്രോഹമാണെന്നും പറഞ്ഞു.

പ്രതിപക്ഷ ഇന്ത്യ മുന്നണി സംഘടിപ്പിച്ച റാലി പൂര്‍ണ പരാജയമെന്ന് ബിജെപി. തെരഞ്ഞെടുപ്പ് ക്രമക്കേടുകളും 'വോട്ട് മോഷണ'വും ആരോപിച്ച് പ്രതിപക്ഷം നടത്തിയ റാലിയെ കടുത്ത ഭാഷയിലാണ് ഭരണപക്ഷം വിമര്‍ശിച്ചത്.

മുൻ മന്ത്രി വീണ ജോർജിനെ ആക്രമിച്ചെന്ന കേസിൽ കെഎസ്‍യു പ്രവർത്തകർക്ക് ക്ലീൻ ചിറ്റ്. കണ്ണൂരിൽ നടന്നത് കരിങ്കൊടി പ്രതിഷേധം മാത്രമാണെന്നും പ്രവർത്തകർ ആക്രമിക്കാൻ ശ്രമിച്ചിട്ടില്ലെന്നും അന്വേഷണ സംഘം റിപ്പോർട്ട് ചെയ്തു.

അവസാന മത്സരത്തില്‍ ഇന്ത്യയെ 7 വിക്കറ്റിന് പരാജയപ്പെടുത്തി ന്യൂസിലന്‍ഡ് ടി20 പരമ്പര 3-2 എന്ന നിലയില്‍ അവസാനിപ്പിച്ചു. അഞ്ചാം പോരാട്ടത്തില്‍ ആദ്യം ബാറ്റ് ചെയ്ത ഇന്ത്യ നിശ്ചിത ഓവറില്‍ 8 വിക്കറ്റ് നഷ്ടത്തില്‍ 191 റണ്‍സ് നേടി. മറുപടി പറഞ്ഞ കിവികള്‍ 18 ഓവറില്‍ 3 വിക്കറ്റ് നഷ്ടത്തില്‍ 195 റണ്‍സ് നേടിയാണ് വിജയം പിടിച്ചത്.

ബംഗാള്‍ ഉള്‍ക്കടലില്‍ വീണ്ടും പുതിയൊരു ചുഴലിക്കാറ്റ് രൂപപ്പെട്ടു. 'മുറസു' എന്നാണ് പേര് നല്‍കിയിരിക്കുന്നത്. ചുഴലിക്കാറ്റ് നേരിട്ട് സ്വാധീനിക്കുന്നില്ലെങ്കിലും അടുത്ത 2-3 ദിവസം കേരളത്തില്‍ പലയിടങ്ങളിലായി ഇടിമിന്നലോട് കൂടിയ ശക്തമായ മഴയ്ക്ക് സാധ്യതയെന്നും കാലാവസ്ഥ വകുപ്പ് അറിയിച്ചു. വടക്കന്‍ ജില്ലകളിലാണ് കൂടുതല്‍ മഴയ്ക്ക് സാധ്യത