കൊളംബോ: ടി20 ലോകകപ്പിൽ ഇന്ത്യക്കെതിരായ മത്സരത്തിൽ തോറ്റതോടെ പാകിസ്ഥാന്റെ സൂപ്പർ 8 പ്രതീക്ഷകൾക്ക് മങ്ങൽ ഏറ്റിരുന്നു. ഇന്ത്യക്കെതിരെയുള്ള തോൽ‌വിയിൽ പാകിസ്ഥാന്റെ നെറ്റ് റൺ റേറ്റിലും വൻ ഇടിവാണ് സംഭവിച്ചത്. ഇതോടെ നാളെ നടക്കാനിരിക്കുന്ന നിർണായക മത്സരത്തിൽ നമീബിയയെ പരാജയപ്പെടുത്തിയാൽ മാത്രമേ പാകിസ്ഥാന് അടുത്തഘട്ടത്തിലേക്ക് കടക്കാൻ സാധിക്കൂ.

ഇന്ത്യക്കെതിരെ കളിക്കാനിറങ്ങുമ്പോള്‍ പാകിസ്ഥാന്റെ നെറ്റ് റണ്‍റേറ്റ് +0.932 ആയിരുന്നു. എന്നാല്‍ വന്‍ തോല്‍വിയിലേക്ക് ഇന്ത്യ അവരെ തള്ളിയിട്ടതോടെ നെറ്റ് റണ്‍റേറ്റ് - 0.403ലേക്ക് ഇടിഞ്ഞു. യുഎസ്എയുടെ നെറ്റ് റണ്‍റേറ്റ് +0.788 ആയി ഉയരുകയും ചെയ്തു. ഇതാണ് പാകിസ്ഥാന് വൻ തിരിച്ചടിയായി മാറിയത്.

യുഎസ്എയ്ക്ക് ഇനി മത്സരമില്ല എന്നതാണ് പാകിസ്ഥാനു ആശ്വാസമായി നില്‍ക്കുന്ന ഒരു ഘടകം. ഇനി മത്സരം മഴമൂലം ഉപേക്ഷിച്ചാലും പാകിസ്ഥാന് കുഴപ്പമില്ല. റൺ റേറ്റിൽ മാറ്റമുണ്ടാകില്ലെങ്കിലും പോയിന്റ് 5 ആയി വർധിക്കും. ഇതോടെ യു എസ് എയെ മറികടന്ന് പാകിസ്ഥാന് സൂപ്പർ 8 ഉറപ്പിക്കാം.

നമീബിയക്കെതിരെയുള്ള മത്സരത്തിൽ സീനിയർ താരങ്ങൾക്ക് പകരം സൽമാൻ മിർസ,നസീം ഷാ, ഫഖർ സമാൻ, ഖവാജ നഫായി എന്നിവരെ പരീക്ഷിക്കാനാണ് മാനേജ്മെന്റിന്റെ തീരുമാനം. ഈ മാറ്റങ്ങൾ വിജയകരമായാൽ ബാബറിന്റെയും ഷഹീന്റെയും ലോകകപ്പ് യാത്ര അവസാനിക്കും. ശ്രീലങ്കയിലെ സിൻഹളീസ് സ്പോർട്ട്സ് ക്ലബ് ഗ്രൗണ്ടിൽ നാളെ ഉച്ചയ്ക്ക് 3 മണിക്കാണ് മത്സരം.