കറാച്ചി: പാകിസ്ഥാന്‍ ക്രിക്കറ്റ് ബോര്‍ഡ് സംഘടിപ്പിച്ച കൗമാര താരങ്ങള്‍ക്കായുള്ള സ്‌കൂള്‍ ക്രിക്കറ്റ് പോരാട്ടത്തില്‍ സെഞ്ച്വറിയടിച്ച് ശ്രദ്ധേയനായി വിദ്യാര്‍ഥിയായ 'ആദം ഗില്‍ക്രിസ്റ്റ്'! പേരടക്കം സകലതും ഓസീസ് ഇതിഹാസം അദം ​ഗിൽക്രിസ്റ്റിനു സമാനമായതാണ് താരത്തെ ശ്രദ്ധേയനാക്കിയത്. ഇതിഹാസ ഓസ്‌ട്രേലിയന്‍ വിക്കറ്റ് കീപ്പര്‍ ബാറ്ററുടെ പേര് മാതാപിതാക്കള്‍ അറിഞ്ഞിട്ടതു പോലെ താരം ബാറ്റും വീശി.

മത്സരത്തില്‍ 11 ബൗണ്ടറികള്‍ ഉള്‍പ്പെടെ 108 പന്തില്‍ ആദം ഗില്‍ക്രിസ്റ്റ് 117 റണ്‍സ് അടിച്ചെടുത്തു. ഓസ്‌ട്രേലിയന്‍ ഇതിഹാസ ക്രിക്കറ്റര്‍ ആദം ഗില്‍ക്രിസ്റ്റിനെ പോലെ തന്നെ വിക്കറ്റ് കീപ്പര്‍ ബാറ്ററാണ് പാകിസ്ഥാന്റെ ഈ കൗമാര ഗില്‍ക്രിസ്റ്റും. മാത്രമല്ല ഇതിഹാസ ഗില്‍ക്രിസ്റ്റിനെ പോലെ ഇടംകൈയന്‍ ബാറ്ററും ഓപ്പണറുമാണ് ഈ കൗമാര താരം!

കമ്രാന്‍ പബ്ലിക്ക് സ്‌കൂളും ഹാപ്പി പാലസ് ഗ്രാമര്‍ സ്‌കൂളും തമ്മിലുള്ള പോരാട്ടത്തിലാണ് താരത്തിന്റെ ഗംഭീര സെഞ്ച്വറി. മത്സരത്തില്‍ ആദം ഗില്‍ക്രിസ്റ്റ് നേടിയ 117 റണ്‍സിന്റെ ബലത്തില്‍ കമ്രാന്‍ സ്‌കൂള്‍ 40 ഓവറില്‍ 4 വിക്കറ്റ് നഷ്ടത്തില്‍ 297 റണ്‍സെന്ന കൂറ്റന്‍ സ്‌കോറുയര്‍ത്തി. ഹാപ്പി പാലസ് സ്‌കൂളിന് 125 റണ്‍സ് മാത്രമാണ് എടുക്കാന്‍ സാധിച്ചത്. കമ്രാന്‍ സ്‌കൂളിന് 172 റണ്‍സിന്റെ വമ്പന്‍ ജയം.

പേര് ഗില്‍ക്രിസ്റ്റ് എന്നാണെങ്കിലും പാക് കൗമാരക്കാരന്റെ ഇഷ്ടതാരം പക്ഷേ ഓസീസ് ഇതിഹാസമല്ല. അത് ശ്രീലങ്കന്‍ ഇതിഹാസ വിക്കറ്റ് കീപ്പര്‍ ബാറ്ററായ കുമാര്‍ സംഗക്കാരയാണ്. മകന് ആദം എന്നാണ് അമ്മ പേരിട്ടത്. ക്രിക്കറ്റ് ആരാധകനും കടുത്ത ഓസ്‌ട്രേലിയന്‍ ഫാനുമായി അച്ഛന്‍ ആദം എന്ന പേരിനൊപ്പം ഗില്‍ക്രിസ്റ്റ് എന്നു കൂടി ചേര്‍ക്കുകയായിരുന്നു.