ശ്രീശാന്ത്, അശ്വിൻ... റെക്കോർഡിൽ ഇനി 'പ്രിൻസ് യാ​ദവും'; നിർണായകം '13 റൺസ്'!

ഇൻഡോർ: വെസ്റ്റ് ഇൻഡീസിനെതിരായ മൂന്നാം ടി20 പോരാട്ടത്തിൽ 10ാം സ്ഥാനത്തിറങ്ങി അപൂർവ നേട്ടം സ്വന്തമാക്കി ഇന്ത്യയുടെ പ്രിൻസ് യാദവ്. മത്സരത്തിൽ ആദ്യം ബാറ്റ് ചെയ്ത ഇന്ത്യക്കായി പത്താമനായി ക്രീസിലെത്തിയ പ്രിൻസ് പുറത്താകാതെ 3 ഫോറുകൾ സഹിതം 13 റൺസ് അടിച്ചെടുത്തിരുന്നു. ഇന്ത്യ 20 ഓവറിൽ 223 റൺസാണ് ബോർഡിൽ ചേർത്തത്. വിൻഡീസിന് 209 റൺസ് എടുക്കാനെ സാധിച്ചുള്ളു. ഇന്ത്യക്ക് 14 റൺസ് വിജയം. പ്രിൻസിന്റെ ആ 13 റൺസ് മത്സരത്തിൽ അത്രയും വിലപ്പെട്ടതായി മാറി എന്ന് ചുരുക്കം. 6 പന്തിലാണ് താരം 13 എടുത്ത് പുറത്താകാതെ നിന്നത്.

അന്താരാഷ്ട്ര ടി20യിൽ 10 അല്ലെങ്കിൽ 11 സ്ഥാനത്തിറങ്ങി 3 അതിൽ കൂടുതൽ ബൗണ്ടറി നേടുന്ന മൂന്നാമത്തെ ഇന്ത്യൻ താരമെന്ന നേട്ടമാണ് പ്രിൻസ് സ്വന്തമാക്കിയത്. നേരത്തെ മലയാളി താരം ശ്രീശാന്ത്, ആർ അശ്വിൻ എന്നിവരാണ് നേട്ടത്തിൽ ആദ്യമെത്തിയവർ. ഇതിൽ തന്നെ പട്ടികയിൽ ഒന്നാം സ്ഥാനത്ത് നിൽക്കുന്നത് ശ്രീശാന്താണ്. താരം 4 ബൗണ്ടറികൾ നേടിയിട്ടുണ്ട്. അശ്വിനും പ്രിൻസും 3 വീതവും.

15 വർഷത്തെ ഇടവേളയ്ക്ക് ശേഷമാണ് ഒരു ഇന്ത്യൻ ബാറ്റർ ഈ നേട്ടം സ്വന്തമാക്കുന്നത്. 2007ൽ ജൊഹന്നാസ്ബർ​ഗിൽ ന്യൂസിലൻഡിനെതിരായ പോരാട്ടത്തിലാണ് ശ്രീശാന്ത് നേട്ടത്തിലെത്തുന്നത്. 2011ൽ കൊൽക്കത്തയിൽ ഇം​ഗ്ലണ്ടിനെതിരെയാണ് അശ്വിന്റെ ബൗണ്ടറികൾ.

19ാം ഓവറിൽ ഇന്ത്യ 8 വിക്കറ്റ് നഷ്ടത്തിൽ 202 റൺസെന്ന നിലയിൽ നിൽക്കുമ്പോഴാണ് പ്രിൻസ് ക്രീസിലെത്തിയത്. ഷമർ ജോസഫാണ് വിൻഡീസിനായി അവസാന ഓവർ എറിഞ്ഞത്. ഈ ഓവറിലാണ് താരം 3 ഫോറുകൾ അടിച്ചെടുത്തത്.

ഡീപ് മി‍ഡ് വിക്കറ്റിലൂടെ ഒരു ലോ ഫുൾ ടോസ് ബോൾ ബൗണ്ടറിലേക്ക് പായിച്ചാണ് പ്രിൻസ് അക്കൗണ്ട് തുറുന്നത്. രണ്ട് പന്തുകൾക്ക് ശേഷം പന്തിന്റെ ​ഗതി മനസിലാക്കി വിക്കറ്റ് കീപ്പർ ഷായ് ഹോപ്പിന്റെ മുകളിലൂടെ അദ്ദേഹം മറ്റൊരു ഫോർ കൂടി നേടി. ഷോർട്ട് ഓഫ് ലങ്ത് പന്തിൽ വന്ന ടോപ് എഡ്ജ് ഷോർട്ട് തേർഡ്മാന് മുകളിലൂടെ പറന്നതോടെ പ്രിൻസിന്റെ മൂന്നാം ഫോറും വന്നു. വെസ്റ്റ് ഇൻഡീസ് താരങ്ങൾ ഈ ഫോർ അനുവദിച്ചത് ചോദ്യം ചെയ്ത് രം​ഗത്തെത്തിയെങ്കിലും അംപയർ തീരുമാനത്തിൽ ഉറച്ചു നിന്നു. അതിനിടെ പ്രിൻസ് ഒരു ബൈ റൺ ഓടിയെടുക്കുകയും ചെയ്തിരുന്നു.