ലണ്ടന്‍: 90 മിനിറ്റ് വരെ ഗോളടിക്കാന്‍ സമ്മതിക്കാതെ പ്രതിരോധിച്ചു. ഇഞ്ച്വറി സമയത്ത് പ്രതിരോധ പൂട്ട് തുടരെ രണ്ട് വട്ടം പൊളിച്ച് ഗോളുകള്‍. ഇംഗ്ലീഷ് പ്രീമിയര്‍ ലീഗില്‍ മിന്നും ജയവുമായി ലിവര്‍പൂള്‍ ഒന്നാം സ്ഥാനത്ത് കുതിപ്പ് തുടരുന്നു. ബ്രെന്‍ഡ്‌ഫോര്‍ഡിനെതിരായ പോരാട്ടം 2-0ത്തിനു വിജയിച്ചാണ് അര്‍നെ സ്ലോട്ടിന്റെ സംഘം മുന്നേറ്റം തുടര്‍ന്നത്.
മറ്റ് മത്സരങ്ങളില്‍ ആഴ്‌സണലിനെ ആസ്റ്റന്‍ വില്ല സമനിലയില്‍ പിടിച്ചു. ന്യൂകാസിലിനെ ബേണ്‍മത്ത് അട്ടിമറിച്ചു. വെസ്റ്റ് ഹാമിനെ ക്രിസ്റ്റല്‍ പാലസും വീഴ്ത്തി. ന്യൂകാസിലിനെ അവരുടെ തട്ടകത്തില്‍ കയറി 1-4നാണ് ബേണ്‍മത്ത് തകര്‍ത്തത്. വെസ്റ്റ് ഹാം 0-2നാണ് ക്രിസ്റ്റല്‍ പാലസിനോടു പരാജയപ്പെട്ടത്. ലെയ്സ്റ്റര്‍ സിറ്റിയെ ഇതേ സ്‌കോറില്‍ ഫുള്‍ഹാമും വീഴ്ത്തി.
ന്യൂനസിന്റെ ഇരട്ട ഗോള്‍
കളിയില്‍ കടുത്ത ആക്രമണം നടത്തിയിട്ടും ലിവര്‍പൂളിനെ 90 മിനിറ്റും ഗോളടിക്കാന്‍ സമ്മതിക്കാതെ പൂട്ടാന്‍ ബ്രെന്‍ഡ്‌ഫോര്‍ഡിനു സാധിച്ചു. എന്നാല്‍ 90 മിനിറ്റു കഴിഞ്ഞ ഇംഞ്ച്വറി സമയത്ത് മത്സരം തുടരവെ രണ്ട് മിനിറ്റനിടെ രണ്ട് ഗോളുകള്‍ വലയിലിട്ടാണ് ലിവര്‍പൂള്‍ മുന്നേറ്റം. ഡാര്‍വിന്‍ ന്യൂനസാണ് രണ്ട് ഗോളുകളും നേടിയ ടീമിന് നടകീയ വിജയമൊരുക്കിയത്. ജയത്തോടെ 50 പോയിന്റുമായി ലിവര്‍പൂള്‍ ഒന്നാം സ്ഥാനത്ത്.
ഗണ്ണേഴ്‌സ് കുരുങ്ങി
ഒന്നാം സ്ഥാനത്തുള്ള ലിവര്‍പൂളുമായി ലീഡ് കുറയ്ക്കാമെന്ന ആഴ്‌സണലിന്റെ മോഹത്തിനു കനത്ത തിരിച്ചടി നല്‍കി ഉനായ് എംറിയുടെ ആസ്റ്റന്‍ വില്ല. മത്സരം 2-2നു സമനിലയില്‍ പിരിഞ്ഞു. രണ്ട് ഗോളിനു പിന്നില്‍ നിന്ന ശേഷം രണ്ട് ഗോള്‍ മടക്കിയാണ് ആസ്റ്റന്‍ വില്ല എമിറേറ്റ്‌സ് സ്‌റ്റേഡിയത്തില്‍ പീരങ്കിപ്പടയെ തളച്ചത്. 35, 55 മിനിറ്റുകളില്‍ ഗബ്രിയേല്‍ മാര്‍ട്ടിനെല്ലി, കയ് ഹവേര്‍ട്‌സ് എന്നിവരാണ് ആഴ്‌സണലിനായി ഗോളുകള്‍ നേടിയത്. 60ാം മിനിറ്റില്‍ യുരി ടിലെമാനസ്, 68ാം മിനിറ്റില്‍ ഒലി വാറ്റ്കിന്‍സനും വില്ലയ്ക്കായി വല ചലിപ്പിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates