ഗുവാഹത്തി: ടീം മാനേജരുടെ മൊബൈൽ ഫോൺ ഉപയോഗത്തിൽ വെട്ടിലായിരിക്കുകയാണ് രാജസ്ഥാൻ റോയൽസ്. റോയൽ ചലഞ്ചേഴ്‌സ് ബംഗളുരുവിന് എതിരായ മത്സരത്തിനിടെ ഡ​ഗൗട്ടിൽ വെച്ച് റോമി ബിന്ദർ ഫോൺ ഉപയോഗിക്കുന്നതിന്റെ ദൃശ്യങ്ങൾ നേരത്തെ പുറത്ത് വന്നിരുന്നു. ബിസിസിഐയുടെ അഴിമതി വിരുദ്ധ ചട്ടങ്ങൾ പ്രകാരം ഇത് തെറ്റായ പ്രവർത്തിയാണ്. ഇതിൽ ടീം മാനേജർക്ക് നടപടി വേണമെന്നാണ് ക്രിക്കറ്റ് വിദഗ്‌ധർ പറയുന്നത്.

മത്സരത്തിന്റെ 11-ാം ഓവറിനിടെയാണ് സംഭവം നടന്നത്. രാജസ്ഥാൻ യുവതാരം വൈഭവ് സൂര്യവംശിയോടൊപ്പം ഡ​ഗൗട്ടിൽ ഇരിക്കുക ആയിരുന്നു ടീം മാനേജർ റോമി ബിന്ദർ. ഈ സമയത്താണ് പോക്കറ്റിൽ നിന്ന് ഫോൺ എടുത്ത് റോമി ബിന്ദർ ഉപയോഗിച്ചത്. ഈ സമയത്ത് സൂര്യവംശി ഫോണിലേക്ക് നോക്കുന്നതും ദൃശ്യങ്ങളിൽ കാണാം.

ഐപിഎൽ ചട്ടങ്ങൾ പ്രകാരം, ടീം മാനേജർമാർക്ക് ഫോൺ ഉപയോഗിക്കുന്നതിന് നിയമപരമായി വിലക്കില്ല. എന്നാൽ അതിന് ചില നിയന്ത്രണങ്ങൾ ഏർപ്പെടുത്തിയിട്ടുണ്ട്. ടീം മാനേജർമാർക്ക് ഡ​ഗൗട്ടിലേക്ക് ഫോൺ കൊണ്ടുപോകാൻ അനുമതിയുണ്ടെങ്കിലും, അത് ഉപയോഗിക്കുന്നത് അനുവദനീയമല്ല. ഡ്രസ്സിങ് റൂമിൽ മാത്രമാണ് ഫോൺ ഉപയോഗിക്കാൻ കഴിയൂ. സംഭവത്തെക്കുറിച്ച് ഇതുവരെ ക്ലബ് ഔദ്യോഗിക വിശദീകരണം നൽകിയിട്ടില്ല.