ന്യൂഡല്‍ഹി: അമ്മ രോഹിണി അയ്യർക്കൊപ്പം വീട്ടിനകത്ത് ക്രിക്കറ്റ് കളിച്ച് ഇന്ത്യന്‍ താരവും പഞ്ചാബ് കിങ്‌സ് നായകനുമായ ശ്രേയസ് അയ്യര്‍. ഇതിന്റെ വിഡിയോ സമൂഹ മാധ്യമങ്ങളില്‍ വൈറലായി.

പഞ്ചാബ് കിങ്‌സ് അവരുടെ ഔദ്യോഗിക എക്‌സ് പേജിലാണ് വിഡിയോ പങ്കിട്ടത്. വിഡിയോക്ക് താഴെ ആരാധകര്‍ രസകരമായ കമന്റുകളാണ് കുറിക്കുന്നത്. ശ്രേയസ് അയ്യര്‍- അമ്മ, ലിവിങ് റൂമിലെ യഥാര്‍ഥ ലോകകപ്പ് ഫൈനല്‍ എന്ന ക്യാപ്ഷനോടെയാണ് പഞ്ചാബ് കിങ്‌സ് വിഡിയോ പങ്കിട്ടത്.

വീട്ടിലെ ഇടനാഴിയിലാണ് ഇരുവരും ക്രിക്കറ്റ് കളിക്കുന്നത്. അമ്മ ശ്രേയസിനു പന്തെറിഞ്ഞു കൊടുക്കുന്നതാണ് വിഡിയോ. ഒരു പന്ത് ശ്രേയസിനു ബാറ്റില്‍ കൊള്ളിക്കാനാകാതെ പോയപ്പോള്‍ അമ്മ ആഘോഷിക്കുന്നതും ദൃശ്യങ്ങളില്‍ കാണാം.

ഇന്ത്യക്കായി രണ്ടാം ടെസ്റ്റ് കളിക്കാന്‍ അമ്മയെ ലഭിക്കുമോ എന്നായിരുന്നു ഒരു ആരാധകന്റെ കമന്റ്. അമ്മ എറിഞ്ഞ രണ്ടാമത്തെ പന്ത് മികച്ചതായിരുന്നു മറ്റൊരാള്‍ കുറിച്ചു.

ശ്രേയസ് അയ്യര്‍ നിലവില്‍ വിശ്രമത്തിലാണ്. ഇന്ത്യയുടെ ഇംഗ്ലണ്ട് പര്യടനത്തിനുള്ള ടീമിലേക്ക് ശ്രേയസിനെ പരിഗണിക്കാതിരുന്നത് വലിയ വിമര്‍ശനങ്ങള്‍ക്കിടയാക്കിയിരുന്നു. ഇന്ത്യയുടെ ചാംപ്യന്‍സ് ട്രോഫി വിജയത്തില്‍ നിര്‍ണായക പങ്ക് വഹിച്ച ശേഷം താരം ഐപിഎല്ലില്‍ പഞ്ചാബ് കിങ്‌സിനെ ഫൈനല്‍ വരെ എത്തിച്ചിരുന്നു.

അടുത്ത മാസം ഇന്ത്യക്ക് ബംഗ്ലാദേശിനെതിരെ പരിമിത ഓവര്‍ ക്രിക്കറ്റ് പോരാട്ടമുണ്ട്. ഈ പോരിനായി ശ്രേയസ് ഇന്ത്യന്‍ ടീമില്‍ തിരിച്ചെത്തും.

Star Indian cricketer Shreyas Iyer shared a light-hearted video of him playing cricket with his own mother at home.