ദുബൈ: ഐസിസിയുടെ ഏറ്റവും പുതിയ വനിതാ ഏകദിന റാങ്കിങില്‍ ബാറ്റര്‍മാരിലെ ഒന്നാം സ്ഥാനം ഇന്ത്യന്‍ ക്യാപ്റ്റന്‍ സ്മൃതി മന്ധാനയ്ക്ക് നഷ്ടമായി. ദക്ഷിണാഫ്രിക്ക ക്യാപ്റ്റന്‍ ലോറ വോള്‍വാര്‍ട് ഒന്നാം റാങ്കിലേക്ക് കയറി.
സിംബാബ്‌വെക്കെതിരായ ഏകദിന പോരാട്ടത്തിലെ ആദ്യ രണ്ട് മത്സരങ്ങളിലും തിളങ്ങാന്‍ സാധിക്കാതെ വന്നതാണ് സ്മൃതിയുടെ ഒന്നാം റാങ്ക് ഇളക്കിയത്. ആദ്യ ഏകദിനത്തില്‍ സ്മൃതി 32 റണ്‍സിനും രണ്ടാം പോരാട്ടത്തില്‍ ഡക്കിലും ഔട്ടായിരുന്നു. മുന്‍ ഇന്ത്യന്‍ ക്യാപ്റ്റന്‍ ഹര്‍മന്‍പ്രീത് കൗര്‍, ദീപ്തി ശര്‍മ എന്നിവര്‍ക്ക് റാങ്കിങില്‍ നേട്ടവുമുണ്ട്. ഇരുവരും രണ്ടാം പോരാട്ടത്തില്‍ സെഞ്ച്വറികളുമായി കളം വാണ് ഇന്ത്യക്ക് കൂറ്റന്‍ സ്‌കോര്‍ സമ്മാനിച്ചിരുന്നു.
ഹര്‍മന്‍പ്രീത് കൗര്‍ രണ്ട് സ്ഥാനങ്ങള്‍ മെച്ചപ്പെടുത്തി 8ാം റാങ്കിലേക്ക് കുതിച്ചെത്തി. നാല് സ്ഥാനം മെച്ചപ്പെട്ട് ദീപ്തി ബാറ്റര്‍മാരില്‍ 23ാം റാങ്കിലെത്തി. ഓള്‍റൗണ്ടര്‍, ബൗളിങ് റാങ്കുകളിലും ദീപ്തിക്ക് മുന്നേറ്റമുണ്ട്. ഓള്‍ റൗണ്ടര്‍ റാങ്കിങില്‍ രണ്ട് സ്ഥാനം ഉയര്‍ന്ന് നാലാം റാങ്കിലും ബൗളര്‍മാരുടെ പട്ടികയില്‍ ഒരു സ്ഥാനം മെച്ചപ്പെടുത്തി എട്ടാം റാങ്കിലും ദീപ്തി സ്ഥാനമുറപ്പിച്ചു.
ടി20 റാങ്കിങില്‍ ഇന്ത്യന്‍ ഓപ്പണര്‍മാരായ ഷെഫാലി വര്‍മ മൂന്നാം റാങ്കിലേക്കും സ്മൃതി മന്ധാന നാലാം റാങ്കിലേക്ക് കയറി നില മെച്ചപ്പെടുത്തി. ഒരോ സ്ഥാനങ്ങളാണ് ഇരുവരും ഉയര്‍ന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates