ഇന്ത്യൻ ക്രിക്കറ്റ് ചരിത്രത്തിൽ ഏറ്റവും സ്വാധീനമുള്ള നായകൻമരിൽ ഒരാളായിരുന്നു കളിക്കുന്ന കാലത്ത് സൗരവ് ​ഗാം​ഗുലി. ഇന്ത്യൻ ക്രിക്കറ്റ് ടീമിൽ അതുവരെ കാണാതിരുന്ന ജയിക്കാനുള്ള അതിതീവ്രമായ ആ​ഗ്രഹം ആവോളം കുത്തിവച്ച ഇന്ത്യൻ ക്യാപ്റ്റൻമാരിൽ ഒരാൾ കൂടിയാണ് ദാദ. ടോസ് ചെയ്യാൻ സ്റ്റീവ് വോയെ ​ഗ്രൗണ്ടിൽ ഏറെ നേരം കാത്തുനിർത്തിയത്, വിഖ്യാതമായ ലോർഡ്സ് മൈതാനത്ത് ജേഴ്സി ഊരിവീശി വിജയം ആഘോഷിച്ചത്, പരിശീലകരായ ​ഗ്രെയ്​ഗ് ചാപ്പൽ, ജോൺ ബുക്കാനൻ എന്നിവരുമായുള്ള ഭിന്നതകൾ, ഷെയ്ൻ വോണുമായുള്ള തർക്കങ്ങൾ, ​ഗ്രെയം സ്മിത്ത് ക്യാച്ചെടുത്തപ്പോൾ ക്രീസിൽ നിന്നു തിരികെ പോകാൻ വിസമ്മതിച്ചത് തുടങ്ങി ഒട്ടേറെ ​ഗാം​ഗുലി ഓർമകൾ ആരാധകർക്ക് ഓർത്തെടുക്കാനുണ്ട്.

ഇപ്പോൾ മുൻ ഓസ്ട്രേലിയൻ ക്യാപ്റ്റൻ മൈക്കൽ ക്ലാർക്ക് ​ഗാം​ഗുലിയുടെ രസകരമായ മറ്റൊരു സംഭവമാണ് പങ്കിടുന്നത്. എഴുത്തുകാരൻ ബോറിയ മജുംദാറിന്റെ 'ഇലവൻ ​ഗോഡ്സ് ആൻഡ് എ ബില്ല്യൺ ഇന്ത്യൻസ്' എന്ന പുസ്തകത്തിൽ ഇന്ത്യയിൽ നടന്ന ഒരു മത്സരത്തിനിടെ അന്നത്തെ ഓസ്ട്രേലിയൻ ക്യാപ്റ്റൻ റിക്കി പോണ്ടിങും ​ഗാം​ഗുലിയും തമ്മിലുള്ള സംഭവമാണ് പുസ്തകത്തിൽ ക്ലാർക്ക് ഓർത്തെടുക്കുന്നത്. (ഏത് മത്സരമായിരുന്നു എന്ന് കൃത്യമായി ക്ലാർക്കിന് ഓർമയില്ലെന്നു അദ്ദേഹം സമ്മതിക്കുന്നുണ്ട്)

'ഇന്ത്യയിൽ നടന്ന ഒരു മത്സരത്തിനിടെ ​ഗാം​ഗുലിയും റിക്കി പോണ്ടിങും ടോസിനായി കളത്തിലെത്തി. (ഏത് കളിയാണെന്നു ഓർമയില്ലെന്നു ക്ലാർക്ക്). പോണ്ടിങിന്റെ കൈയിലായിരുന്നു നാണയം. അദ്ദേഹം നാണയം വായുവിലേക്ക് എറിഞ്ഞ നിമിഷത്തിൽ ​ഗാം​ഗുലി ഹെഡ്- ടെയിൽ എന്നാണ് വിളിച്ചത്.'

'വിശ്വസിക്കു, റിക്കി തന്നെയാണ് എന്നോട് ഈ കഥ പറഞ്ഞത്. ദാദ പെട്ടെന്ന് ഹെഡ്- ടെയിൽ എന്നു രണ്ടും പറഞ്ഞപ്പോൾ എന്താണ് സംഭവിച്ചത് എന്നു പോലും മനസിലാക്കാൻ റിക്കിക്ക് കഴിഞ്ഞില്ല. മിന്നൽ വേ​ഗത്തിലാണ് ദാദ ഹെഡ്- ടെയിൽ എന്നു പറഞ്ഞത്. എന്താണ് സംഭവിച്ചത് എന്നു പിടികിട്ടാൻ റിക്കിക്ക് ഒന്നോ രണ്ടോ സെക്കൻഡ് സമയം വേണ്ടിവന്നു. അപ്പോഴേക്കും നാണയം താഴെ വീണിരുന്നു. ​ഗാം​ഗുലി ഉടൻ തന്നെ നാണയമെടുത്ത് റിക്കിയോട് ഞങ്ങൾ ബാറ്റ് ചെയ്യുന്നു എന്നു പറഞ്ഞ് നടന്നു പോയി.'

ലഭ്യമായ റെക്കോർഡുകൾ പ്രകാരം റിക്കി പോണ്ടിങിനെതിരെ ​ഗാം​ഗുലി അഞ്ച് തവണയാണ് ടോസ് നേടിയത്. അവയെല്ലാം ഇന്ത്യക്ക് പുറത്തു വച്ചായിരുന്നു. രണ്ട് തവണ 2003ലെ ലോകകപ്പിലും മൂന്ന് തവണ 2003-04ലെ വിബി സീരീസിലുമാണ്. അതിനാൽ സംഭവം വിവരിക്കുമ്പോൾ മത്സരവേ​ദി ഏതാണെന്ന കാര്യത്തിൽ ക്ലാർക്കിന് തെറ്റ് പറ്റിയിട്ടുണ്ടാകാം. കാരണം മത്സരം ഇന്ത്യയിലാണ് നടന്നതെങ്കിൽ നാണയം എറിയേണ്ടത് എതിർ ക്യാപ്റ്റനായ പോണ്ടിങ് ആയിരിക്കില്ല. അതിനാൽ തന്നെ സംഭവം ഇന്ത്യക്ക് വെളിയിൽ വച്ച് നടന്ന മത്സരമാകാനാണ് സാധ്യത.