അഹമ്മദാബാദ്: ലോകകപ്പ് പോലെയുള്ള വലിയ ടൂര്ണമെന്റുകള് നടക്കുമ്പോള് സന്ദര്ശക ടീമുകള് ആതിഥേയ രാജ്യത്തെ ആഭ്യന്തര താരങ്ങളെ പരീശിലനത്തില് സഹായിക്കാനായി വിട്ടുനല്കാന് അതത് ക്രിക്കറ്റ് അസോസിയേഷനുകളോട് ആവശ്യപ്പെടാറുണ്ട്. പ്രത്യേകിച്ച് റിസ്റ്റ്, മിസ്ട്രി സ്പിന്നര്മാരെ ഒക്കെയാണ് ഇത്തരത്തില് മറ്റ് ടീമുകള് തേടാറുള്ളത്.
എന്നാല് നെതര്ലന്ഡ്സ് ടീം കഴിഞ്ഞ ദിവസം ഗുജറാത്ത് ക്രിക്കറ്റ് അസോസിയേഷനോടു ഒരുകാര്യം ആവശ്യപ്പെട്ടു. അവര്ക്ക് നെറ്റ് പരിശീലനത്തിനായി ഒരു ബാറ്ററെ വേണം എന്നായിരുന്നു ആവശ്യം. ഒരു ഇടം കൈ ബാറ്റര് തന്നെ വേണമെന്നും അവര് പ്രത്യേകം വ്യക്തമാക്കിയിരുന്നു.
ഇന്ത്യക്കെതിരെയാണ് ഇനി നെതര്ലന്ഡ്സിന്റെ ടി20 ലോകകപ്പിലെ പോരാട്ടം. ഈ മത്സരം അവരെ സംബന്ധിച്ചു അതി നിര്ണായകമാണ്. നിലവില് മൂന്ന് കളികളില് ഒരു ജയമാണ് അവര്ക്കുള്ളത്. അവസാന പോരാട്ടത്തില് ഇന്ത്യക്കെതിരെ വിജയിക്കുകയാണ് ഓറഞ്ച് സംഘം ലക്ഷ്യമിടുന്നത്. ഇതിന്റെ ഭാഗമായാണ് നെതര്ലന്ഡ്സ് ഇടം കൈയന് ബാറ്ററെ വച്ച് പരിശീലിക്കാനുള്ള തീരുമാനം എടുത്തത്.
ഇന്ത്യയുടെ ആറ് മുന്നിര ബാറ്റര്മാര് ഇടം കൈയന്മാരാണ്. അഭിഷേക് ശര്മ, ഇഷാന് കിഷന്, തിലക് വര്മ, ശിവം ദുബെ, റിങ്കു സിങ്, അക്ഷര് പട്ടേല് എന്നിവരാണ് ടീമിലെ ഇടം കൈ ബാറ്റര്മാര്. നെതര്ലന്ഡ്സ് ടീമിന്റെ മുന്നിരയില് ഒരു ഇടംകൈയന് ബാറ്ററുമില്ല. ഇതോടെയാണ് അവര് ഗുജറാത്ത് ക്രിക്കറ്റ് അസോസിയനേഷനോട് ആവശ്യം ഉന്നയിച്ചത്.
ഗുജറാത്ത് അസോസിയേഷന് നെതര്ലന്ഡ്സിന്റെ ആവശ്യം പരിഗണിച്ച് ഒരു താരത്തെ പരിശീലന മൈതാനത്തേക്ക് അയച്ചു കൊടുക്കുകയും ചെയ്തു. ഗുജറാത്ത് രഞ്ജി ടീം ക്യാപ്റ്റന് മനന് ഹിംഗ്രാജിയയാണ് ഓറഞ്ച് സംഘത്തിലെ ബൗളര്മാര്ക്കു പരിശീലിക്കാനായി എത്തിയ നെറ്റ് ബാറ്റര്. ഗുജറാത്തിന്റെ രഞ്ജി പോരാട്ടങ്ങള് നേരത്തെ തന്നെ അവസാനിച്ചതിനാല് താരങ്ങള് വ്യക്തിപരമായ പരിശീലനങ്ങളുടെ തിരക്കിലായിരുന്നു. അതിനിടെയാണ് 27കാരനായ ഗുജറാത്ത് നായകന് അപ്രതീക്ഷിത വിളിയെത്തിയത്.
മനന് ഹിംഗ്രാജിയയെ നെതര്ലന്ഡ്സ് കോച്ച് റയാന് കുക്ക് സ്വീകരിച്ചു. പിന്നീട് ഓറഞ്ച് ടീമിനൊപ്പം 2 മണിക്കൂറോളം പരിശീലനം നടത്തിയാണ് താരം കളം വിട്ടത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates