സെന്റ് ലൂസിയ: ഇന്ത്യന്‍ ടീം ഓസ്‌ട്രേലിയക്കെതിരായ ടി20 ലോകകപ്പ് സൂപ്പര്‍ 8 പോരാട്ടത്തിനായി സെന്റ് ലൂസിയയില്‍ എത്തി. ഇപ്പോള്‍ വൈറലായി മാറുന്നത് ടീം അംഗങ്ങള്‍ വിമാനത്തില്‍ നിന്നു ഇറങ്ങുന്നതിനിടെ സഞ്ജു സാംസണ്‍ പറഞ്ഞ ഡയലോഗാണ്.

മലയാളത്തില്‍ സൂപ്പര്‍ ഹിറ്റായി മാറിയ ഫഹദ് ഫാസിലിന്റെ ആവേശം സിനിമയിലെ ഡയലോഗാണ് ഇന്ത്യന്‍ താരങ്ങള്‍ക്കൊപ്പം വിമാനത്തില്‍ വച്ച് സഞ്ജു പറയുന്നത്. ഇതാണ് ആരാധകര്‍ ഏറ്റെടുത്തത്. വിമാനത്തിന്റെ വാതിലിനരികിലേക്ക് ലഗേജുമായി നീങ്ങുന്നതിനിടെയാണ് സഞ്ജുവിന്റെ ഡയലോഗ്.

'എട മോനെ, ഹാപ്പിയല്ലേ'- എന്നായിരുന്നു സഞ്ജുവിന്റെ ചോദ്യം.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

സിനിമയില്‍ പല ഘട്ടങ്ങളിലാണ് ഫഹദ് മറ്റുള്ളവരെ സംബോധന ചെയ്യുന്നത് 'എട മോനെ' എന്നു വിളിച്ചാണ്. 'മക്കള്‍ ഹാപ്പിയല്ലേ' എന്ന ഡയലോഗും സിനിമയിലുണ്ട്. മിഥുന്‍ ജയ് ശങ്കര്‍ അവതരിപ്പിച്ച ബിബി എന്ന കഥാപാത്രത്തിന്റെ അമ്മയാണ് ഇടക്കിടെ ഈ ഡയലോഗ് പറയുന്നത്. രണ്ടും ചേര്‍ത്തായിരുന്നു സഞ്ജുവിന്റെ 'ആവേശം!'

ടി20 ലോകകപ്പില്‍ ഇന്ന് രാത്രി എട്ട് മണി മുതലാണ് ഇന്ത്യ- ഓസ്‌ട്രേലിയ പോരാട്ടം. നിലവില്‍ ഇന്ത്യ സെമിക്കരികിലാണ്. ഓസ്‌ട്രേലിയക്കെതിരായ പോരാട്ടം ജയിച്ചാല്‍ ഇന്ത്യ സെമി ഉറപ്പിക്കും. 15 അംഗ സംഘത്തില്‍ ഉള്‍പ്പെട്ടിട്ടുണ്ടെങ്കിലും സഞ്ജുവിനു ഇതുവരെ പ്ലെയിങ് ഇലവനില്‍ ഇടം കിട്ടിയിട്ടില്ല.