മുംബൈ: ടി20 ലോകകപ്പിനു ശേഷം ഇന്ത്യന്‍ ക്രിക്കറ്റ് ടീമിന്റെ മൂന്ന് ഹോം പരമ്പരകളുടെ മത്സരക്രമം പുറത്തുവിട്ട് ബിസിസിഐ. ബംഗ്ലാദേശ്, ന്യൂസിലന്‍ഡ്, ഇംഗ്ലണ്ട് ടീമുകള്‍ക്കെതിരായ മൂന്ന് ഫോര്‍മാറ്റുകളിലുള്ള പരമ്പരയാണ് ഇന്ത്യ കളിക്കുന്നത്.

സെപ്റ്റംബറില്‍ ബംഗ്ലാദേശിനെതിരായ ടെസ്റ്റ് പരമ്പരയോടെയാണ് ഹോം സീരീസുകള്‍ ആരംഭിക്കുന്നത്. പിന്നാലെ ടി20 പരമ്പരയും ബംഗ്ലാദേശിനെതിരെ കളിക്കും.

സെപ്റ്റംബര്‍ 19 മുതലാണ് ആദ്യ ടെസ്റ്റ്. ചെന്നൈയിലാണ് ആദ്യ മത്സരം. രണ്ടാം ടെസ്റ്റ് സെപ്റ്റംബര്‍ 27 മുതല്‍. കാണ്‍പൂരാണ് വേദി.

പിന്നാലെ ടി20 പരമ്പര. ധരംശാല, ഡല്‍ഹി, ഹൈദരാബാദ് എന്നിവയാണ് വേദികള്‍. ഒക്ടോബര്‍ ആറിനാണ് ആദ്യ ടി20. ഒക്ടോബര്‍ 9, 12 തീയതികളിലാണ് ശേഷിക്കുന്ന മത്സരങ്ങള്‍.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

ന്യൂസിലന്‍ഡിനെതിരെ മൂന്ന് ടെസ്റ്റുകളടങ്ങിയ പരമ്പരയാണ് ഇന്ത്യ കളിക്കുന്നത്. ഒന്നാം ടെസ്റ്റ് ഒക്ടോബര്‍ 16 മുതല്‍ ബംഗളൂരുവില്‍. രണ്ടാം ടെസ്റ്റ് ഒക്ടോബര്‍ 24 മുതല്‍ പുനെയില്‍. മൂന്നാം ടെസ്റ്റ് നവംബര്‍ ഒന്ന് മുതല്‍ മുംബൈയില്‍.

ഇംഗ്ലണ്ടിനെതിരെ ഇന്ത്യ അഞ്ച് ടി20 മത്സരങ്ങളും മൂന്ന് ഏകദിന മത്സരങ്ങളും അടങ്ങിയ പരമ്പരയാണ് കളിക്കുന്നത്. പുതു വര്‍ഷത്തിലാണ് ഇംഗ്ലണ്ടിനെതിരായ പോരാട്ടം.

ഒന്നാം ടി20 2025 ജനുവരി 22നു ചെന്നൈയില്‍. രണ്ടാം പോര് 25നു കൊല്‍ക്കത്തയില്‍. മൂന്നാം പോരാട്ടം 28നു രാജ്‌കോട്ടില്‍. നാലാം മത്സരം 31ന് പുനെയില്‍. അഞ്ചാം പോരാട്ടം ഫെബ്രുവരി രണ്ടിനു മുംബൈയില്‍.

ഫെബ്രുവരി ആറിനാണ് ഏകദിന പരമ്പര തുടങ്ങുന്നത്. നാഗ്പുരാണ് വേദി. രണ്ടാം ഏകദിനം 9നു കട്ടക്കില്‍. മൂന്നാം മത്സരം 12നു അഹമദാബാദില്‍.