കോപ്പ അമേരിക്ക ​ഗ്രൂപ്പ് എയിൽ ബൊളീവിയയെ എതിരില്ലാത്ത രണ്ട് ​ഗോളിന് തകർത്ത് ഉറു​ഗ്വേ. 22 ഷോട്ടുകളുമായി ഉറു​ഗ്വേ ആക്രമണം നടത്തിയെങ്കിലും അവസരങ്ങൾ പലതും വേണ്ടവിധം വിനിയോ​ഗിക്കാൻ അവർക്കായില്ല. 

40ാം മിനിറ്റിൽ ബൊളിവിയൻ ​ഗോൾകീപ്പറുടെ ഓൺ ​ഗോളിൽ നിന്നാണ് ഉറു​ഗ്വേ അക്കൗണ്ട് തുറന്നത്. ബോക്സിൽ പന്ത് ക്ലിയർ ചെയ്യാൻ ബൊളിവിയൻ പ്രതിരോധനിര താരം ശ്രമിക്കുന്നതിന് ഇടയിൽ ​ഗോൾകീപ്പർ കാർലോസ് ലാംപെയുടെ ദേഹത്ത് തട്ടി ​ഗോൾവല കുലുക്കുകയായിരുന്നു. 

കൗണ്ടർ അറ്റാക്ക് നടത്തി 79ാം മിനിറ്റിൽ കവാനിയിലൂടെയായിരുന്നു ഉറു​ഗ്വേയുടെ രണ്ടാമത്തെ ​ഗോൾ. ഉറു​ഗ്വേയുടെ നിരന്തരമുള്ള ആക്രമണത്തെ ചെറുത്ത് നിന്ന ​ഗോൾകീപ്പറാണ് വലിയ മാർജിനിലെ തോൽവിയിൽ നിന്ന് ബൊളിവിയയെ രക്ഷിച്ചത്.

ലോകകപ്പ് യോ​ഗ്യതാ മത്സരം ഉൾപ്പെടെ കഴിഞ്ഞ 5 കളികളിൽ ഉറു​ഗ്വേയ്ക്ക് സ്കോർ ചെയ്യാൻ സാധിച്ചിരുന്നില്ല. ചിലിക്കെതിരെ 1-1ന് സമനില പിടിച്ചായിരുന്നു ഉറു​ഗ്വേ ​ഗോൾ സ്കോറിങ്ങിലേക്ക് തിരിച്ചെത്തിയത്.  ബൊളിവിയക്കെതിരെ ​ഗോൾ വല കുലുക്കാനായതും അവസരങ്ങൾ സൃഷ്ടിക്കാനായതും സുവാരസിന്റേയും കൂട്ടരുടേയും ആത്മവിശ്വാസം കൂട്ടും.