വെല്ലിംഗ്ടൺ: യൂറോ കപ്പ് ഫൈനലിൽ പരാജയപ്പെട്ട ഇം​ഗ്ലണ്ടിനെ ട്രോളി ന്യൂസിലൻഡ് ക്രിക്കറ്റ് താരങ്ങൾ. 2019 ഏകദിന ലോകകപ്പിൽ ന്യൂസിലൻഡ് ഇംഗ്ലണ്ടിനോട് പരാജയപ്പെട്ടിരുന്നു. അന്ന് നിശ്ചിത ഓവറിലും സൂപ്പർ ഓവറിലും മത്സരം ടൈ ആയിരുന്നു. പിന്നാലെ ഏറ്റവും കൂടുതൽ ബൗണ്ടറി നേടിയ പരിഗണനവച്ച് ഇംഗ്ലണ്ടിനെ വിജയികളായി പ്രഖ്യാപിക്കുകയായിരുന്നു. ഇക്കാര്യം മുൻനിർത്തിയായിരുന്നു കിവി താരങ്ങളുടെ പരിഹാസം. 

ന്യൂസിലൻഡ് മുൻ താരം സ്‌കോട് സ്‌റ്റൈറിസും ഓൾറൗണ്ടർ ജിമ്മി നീഷം എന്നിവരാണ് ട്വിറ്റർ കുറിപ്പിലൂടെ ഇം​ഗ്ലണ്ടിനെ പരിഹസിച്ചത്. മത്സരം നിശ്ചിത സമയത്തും അധിക സമയത്തും സമനിലയായെങ്കിലും ഇംഗ്ലണ്ടിന് വിജയിക്കാൻ ഒരു വഴിയുണ്ടായിരുന്നുവെന്നാണ് ഇരുവരും പറയുന്നത്. 

ഏറ്റവും കൂടുതൽ കോർണർ നേടിയത് ഇംഗ്ലണ്ടായിരുന്നു അതുവഴി ഇംഗ്ലണ്ടിനെ ജയിപ്പിക്കാമായിരുന്നുവെന്നാണ് സ്റ്റൈറിസ് പറയുന്നത്. ഏറ്റവും കൂടുതൽ പാസുകൾ നൽകിയവെ വിജയിപ്പിക്കാമായിരുന്നു എന്നാണ് നീഷം പറഞ്ഞത്. 

'എനിക്കൊന്നും മനസിലാകുന്നില്ല. ഇംഗ്ലണ്ടിനാണ് കൂടുതൽ കോർണറുകൾ ലഭിച്ചത്. അവരാണ് യൂറോ ചാംപ്യന്മാർ.' സ്റ്റൈറിസ് പരിഹാസത്തോടെ കുറിച്ചിട്ടു.

'എന്തിനാണ് പെനാൽറ്റി ഷൂട്ടൗട്ട്. ആരാണോ കൂടുതൽ പാസുകൾ നൽകിയത് അവരെ ജയിപ്പിക്കാമായിരുന്നില്ലേ ?' നീഷം പരിഹാസത്തോടെ ചോദിച്ചു.