സാഗ്രബ്: രാജ്യാന്തര ക്രിക്കറ്റിലെ ഏറ്റവും പ്രായം കുറഞ്ഞ ക്യാപ്റ്റനെന്ന റെക്കോര്‍ഡ് സ്വന്തമാക്കി ക്രൊയേഷ്യയുടെ സാക് വുകുസിച്. 17 വയസും 311 ദിവസവും പ്രായമുള്ളപ്പോഴാണ് താരം ടീമിനെ നയിക്കാനായി ഗ്രൗണ്ടിലെത്തിയത്. സാഗ്രബിലെ മാദോസ്റ്റ് ക്രിക്കറ്റ് മൈതാനത്ത് സൈപ്രസിനെതിരെ നടക്കുന്ന നാല് മത്സരങ്ങളടങ്ങിയ ടി20 പരമ്പരയില്‍ ക്രൊയേഷ്യയെ നയിച്ചാണ് താരം ചരിത്രമെഴുതിയത്.

2022ല്‍ 18 വയസും 24 ദിവസവും പ്രായമുള്ളപ്പോള്‍ ചെക്ക് റിപ്പബ്ലിക്കിനെതിരായ പോരാട്ടത്തില്‍ ഫ്രാന്‍സ് ക്യാപ്റ്റനായി കളത്തിലെത്തിയ നൊമാന്‍ അംജദിന്റെ റെക്കോര്‍ഡാണ് വുകുസിച് പഴങ്കഥയാക്കിയത്.

17 വയസുള്ളപ്പോള്‍ ദേശീയ ടീമിനെ നയിക്കുന്ന ചരിത്രത്തിലെ ആദ്യ ക്രിക്കറ്റ് താരമെന്ന അപൂര്‍വ റെക്കോര്‍ഡും വുകുസിചിന്റെ പേരിലായി. 2024ല്‍ ബെല്‍ജിയത്തിനെതിരായ പോരാട്ടത്തിലാണ് വുകുസിച് രാജ്യാന്തര ക്രിക്കറ്റില്‍ അരങ്ങേറിയത്.

ക്യാപ്റ്റനായുള്ള അരങ്ങേറ്റ പോരാട്ടം താരം മോശമാക്കിയതുമില്ല. മത്സരത്തില്‍ ടീമിന്റെ ടോപ് സ്‌കോറര്‍ വുകുസിചാണ്. 32 പന്തില്‍ 5 ഫോറും 2 സിക്‌സും സഹിതം വുകുസിച് 43 റണ്‍സ് അടിച്ചെടുത്തു. പക്ഷേ കളി ക്രൊയേഷ്യ തോറ്റു. 58 റണ്‍സിനാണ് ടീമിന്റെ തോല്‍വി.