മെൽബൺ: കഴിഞ്ഞ വർഷത്തെ ഫൈനലിസ്റ്റായ അലക്സാണ്ടർ സ്വരേവ് വീണ്ടും ഓസ്‌ട്രേലിയൻ ഓപ്പണിന്റെ സെമിഫൈനലിലെത്തി. യുവ അമേരിക്കൻ താരം ലേണർ ടിയനെ പരാജയപ്പെടുത്തിയാണ് ജർമൻ താരത്തിന്റെ മുന്നേറ്റം. നാല് സെറ്റുകൾ നീണ്ടുനിന്ന കടുത്ത പോരാട്ടത്തിനൊടുവിലാണ് സ്വരേവ് വിജയം നേടിയത്. സ്കോർ: 6-3, 6-7 (5/7), 6-1, 7-6 (7-3)

ആദ്യ സെറ്റ് 6-3ന് സ്വരേവ് സ്വന്തമാക്കിയപ്പോൾ രണ്ടാം സെറ്റിൽ ടിയൻ ശക്തമായി തിരിച്ചുവന്ന് ടൈബ്രേക്കിൽ 7-5 എന്ന സ്കോറിന് വിജയിച്ച് മത്സരം സമനിലയിലാക്കുക ആയിരുന്നു. മൂന്നാം സെറ്റിൽ സ്വരേവ് 6-1 എന്ന സ്കോറിലൂടെ മത്സരത്തിൽ തിരിച്ചു വന്നു. നാലാം സെറ്റിൽ ടിയൻ വീണ്ടും പൊരുതി 6-5ന് സെറ്റ് പോയിന്റ് നേടുകയും ചെയ്തു. എന്നാൽ പരിചയസമ്പന്നനായ സ്വരേവ് ടൈബ്രേക്കിൽ 7-3 എന്ന സ്‌കോറിൽ മത്സരം തിരിച്ചു പിടിക്കുക ആയിരുന്നു.

തുടർച്ചയായ നാലാം തവണയാണ് സ്വരേവ് ടൂർണമെന്റിന്റെ സെമിയിൽ എത്തുന്നത്. കഴിഞ്ഞ വർഷത്തെ ഫൈനലിൽ യാനിക് സിന്നറോട് പരാജയപ്പെട്ട സ്വരേവിന് ഇത്തവണ കിരീടം നേടാമെന്ന ഉറച്ച പ്രതീക്ഷയിലാണ്. സെമിയിൽ ലോക ഒന്നാം നമ്പർ താരം കാർലോസ് അൽക്കാരാസ് അല്ലെങ്കിൽ അലക്‌സ് ഡി മിനൗർ എന്നിവരിൽ ഒരാളെയാകും സ്വരേവ് നേരിടുക.