റാഞ്ചി: മുന്‍ ഇന്ത്യന്‍ നായകന്‍ മഹേന്ദ്ര സിങ് ധോനിയുടെ നരച്ച താടിയുമായുള്ള ചിത്രം സാമൂഹിക മാധ്യമങ്ങളില്‍ നേരത്തെ വൈറലായി മാറിയിരുന്നു. മകള്‍ സിവയുടെ ഇന്‍സ്റ്റഗ്രാമില്‍ പോസ്റ്റ് ചെയ്ത വീഡിയോയിലും നരച്ച താടിയുള്ള ധോനിയെ കാണാം. കഴിഞ്ഞ ദിവസം പോസ്റ്റ് ചെയ്ത വീഡിയോയും ധോനിയുടെ പുതിയ രൂപത്തെ കുറിച്ചുള്ള ചര്‍ച്ചകള്‍ക്കാണ് വഴിയൊരുക്കിയത്. ധോനിയും മകളും വളര്‍ത്തു നായകളും ഒരുമിച്ച് കളിക്കുന്നതാണ് വീഡിയോ. 

ഇപ്പോള്‍ മകന്റെ പുതിയ രൂപത്തെക്കുറിച്ച് അഭിപ്രായവുമായി രംഗത്തെത്തിയിരിക്കുകയാണ് ധോനിയുടെ അമ്മ ദേവകി ദേവി. ധോനിക്ക് അത്ര പ്രായമൊന്നും ആയിട്ടില്ലെന്നാണ് അമ്മ പറയുന്നത്. 

'അവന്റെ പുതിയ രൂപം ഞാന്‍ കണ്ടു. പക്ഷേ അതില്‍ കാണുന്ന തരത്തിലുള്ള പ്രായമൊന്നും അവന് ആയിട്ടില്ല. എത്ര പ്രായമായാലും എല്ലാ അമ്മമാര്‍ക്കും അവരുടെ മക്കള്‍ എല്ലായ്പ്പോഴും കുഞ്ഞുങ്ങള്‍ തന്നെയാണ്'- ദേവകി ദേവി പറഞ്ഞു. ഒരു മാധ്യമത്തിന് നല്‍കിയ അഭിമുഖത്തിലാണ് അവര്‍ അഭിപ്രായം പങ്കിട്ടത്. 

സാമൂഹിക മാധ്യമങ്ങളില്‍ ധോനിയുടെ രൂപത്തെക്കുറിച്ച് വലിയ ചര്‍ച്ചകളാണ് നടന്നത്. തങ്ങളുടെ പ്രിയപ്പെട്ട താരത്തിന് പ്രായമാകുന്നതിന്റെ സങ്കടവും ചിലര്‍ പങ്കിട്ടിരുന്നു.