ന്യൂഡല്‍ഹി: ലോകകപ്പ് ക്രിക്കറ്റില്‍ ഇംഗ്ലണ്ടിനെതിരായ മത്സരത്തില്‍ ഇന്ത്യ കഴിവിന്റെ പരമാവധി ശ്രമിച്ചെന്ന് മുന്‍ പാക് താരം ഷോയബ് അക്തര്‍. പാകിസ്ഥാനെ പുറത്താക്കാന്‍ ഇന്ത്യ ഇംഗ്ലണ്ടിനോടു തോറ്റുകൊടുത്തെന്ന വിമര്‍ശനങ്ങള്‍ക്കിടെയാണ് പാക് താരത്തിന്റെ അഭിപ്രായ പ്രകടനം.
വിഭജനത്തിനു ശേഷം ഇത് ആദ്യമായാണ് ഇന്ത്യയുടെ വിജയത്തിനായി പാക് ആരാധകര്‍ പ്രാര്‍ഥിച്ചതെന്ന് തന്റെ യൂട്യൂബ് ചാനല്‍ വിഡിയോയില്‍ അക്തര്‍ പറഞ്ഞു. ഇന്ത്യ അവരുടെ കഴിവിന്റെ പരമാവധി ശ്രമിച്ചെന്നു തന്നെയാണ് കരുതുന്നത്. എന്നാല്‍ അതുകൊണ്ടു പാകിസ്ഥാനു ഗുണമില്ലാതെ പോയി- അക്തര്‍ പറഞ്ഞു.
ഇംഗ്ലിഷ് ബാറ്റ്‌സ്മാന്‍മാര്‍ സാഹചര്യത്തിന്റെ ആനുകൂല്യം പരമാവധി മുതലാക്കി. ഇന്ത്യന്‍ ബൗളിങ്ങിന്റെ ദൗര്‍ബല്യങ്ങള്‍ അവര്‍ തുറന്നുകാട്ടി. സ്പിന്നര്‍മാര്‍ നല്ലപോലെ തല്ലുവാങ്ങി, ചാഹലിനെയൊക്കെ അവര്‍ അടിച്ചു പരത്തി.
നന്നായി പന്തെറിഞ്ഞിരുന്നെങ്കില്‍ ഇഗ്ലിഷ് ടോട്ടലില്‍ ഒരു മുപ്പതു റണ്‍സെങ്കിലും കുറയ്ക്കാന്‍ ഇന്ത്യയ്ക്കാവുമായിരുന്നു. മുന്നൂറിനടുത്താണ് ലക്ഷ്യമെങ്കില്‍ ഇന്ത്യന്‍ ബാറ്റ്‌സമാന്‍മാര്‍ക്ക് അതു മറികടക്കാനാവും. ആദ്യ പത്ത് ഓവറിലും അവസാന ഓവറുകളിലും ഇന്ത്യന്‍ ബാറ്റിങ് മോശമായിരുന്നെന്നും അക്തര്‍ പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates