ദുബായ്‌:ഏകദിന പദവി നേടി പാപുവ ന്യു ഗിനിയ. വേള്‍ഡ് ക്രിക്കറ്റ് ലീഗ് ഡിവിഷന്‍ 2ല്‍ ഒമാനെ തകര്‍ത്തതോടെയാണ് ഏകദിന പദവി പാപുവ ന്യു ഗിനിയയെ തേടിയെത്തിയത്. 

ഏകദിന പദവി സ്വന്തമാക്കുവാന്‍ ജയം അനിവാര്യമായിരുന്ന മത്സരത്തില്‍ ഒമാനെതിരെ 145 റണ്‍സിന്റെ ജയമാണ് പിഎന്‍ജി നേടിയത്. കാനഡയ്ക്ക് മുന്നിലും ഏകദിന പദവി നേടുവാനുള്ള അവസരമുണ്ടായെങ്കിലും തലനാരിഴയ്ക്ക് അവരില്‍ നിന്നും കളി വിട്ടുപോയി. 

കാനഡയ്‌ക്കെതിരെ ചെയ്‌സ് ചെയ്ത് ഇറങ്ങി യുഎസ്സിനെ 212 റണ്‍സിനുള്ളില്‍ കാനഡയ്ക്ക് ഒതുക്കേണ്ടിയിരുന്നു. എന്നാല്‍ ഒന്‍പത് വിക്കറ്റ് നഷ്ടത്തില്‍ 215 റണ്‍സിലേക്ക് എത്തിയാണ് യുഎസ് കളി അവസാനിപ്പിച്ചത്. അവിടെ കാനഡ 40 റണ്‍സിന്റെ ജയം നേടിയെങ്കിലും ഏകദിന പദവി സ്വന്തമാക്കുവാന്‍ കാനഡയ്ക്ക് അത് പോരായിരുന്നു. നെറ്റ് റണ്‍റേറ്റിന്റെ അടിസ്ഥാനത്തില്‍ കാനഡ പുറത്തേക്ക് പോയി. 

ഹോങ്കോങ്ങിനെ 151 റണ്‍സിന് തകര്‍ത്ത് നമീബിയയും ടോപ് 4ലേക്ക് എത്തിയിരുന്നു. ഐസിസി ലോകപ്പ് ലീഗ് 2ല്‍ പിഎന്‍ജി, നമീബിയ, ഒമാന്‍, യുഎസ്, സ്‌കോട്ട്്‌ലാന്‍ഡ്, നേപ്പാള്‍, യുഎഇ എന്നീ ടീമികളാണ് അടുത്ത ഘട്ടത്തിലേക്ക് കടക്കുന്നത്. 2023ലെ ലോകകപ്പിലേക്ക് യോഗ്യത നേടുന്നതിനായി ഈ ടീമുകള്‍ 36 മത്സരങ്ങള്‍ വീതം അടുത്ത രണ്ടര വര്‍ഷത്തിനുള്ളില്‍ കളിക്കും.