ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ മാഞ്ചസ്റ്റര്‍ യുനൈറ്റഡിന് പിന്നാലെ കരുത്തരായ ചെല്‍സി, ടോട്ടനം ഹോട്‌സ്പര്‍ ടീമുകള്‍ക്കും വിജയത്തുടക്കം. 

ചെല്‍സി മറുപടിയില്ലാത്ത മൂന്ന് ഗോളുകള്‍ക്ക് ഹഡ്ഡേഴ്‌സ്ഫീല്‍ഡിനെ പരാജയപ്പെടുത്തിയപ്പോള്‍ ടോട്ടനം ഒന്നിനെതിരേ രണ്ട് ഗോളുകള്‍ക്ക് ന്യൂകാസില്‍ യുനൈറ്റഡിനെ വീഴ്ത്തി. 

ബേണ്‍മൗത്ത്, വാട്‌ഫോര്‍ഡ്, ക്രിസ്റ്റല്‍ പാലസ് ടീമുകളും വിജയത്തോടെ തുടങ്ങി. ബേണ്‍ മൗത്ത്- കാര്‍ഡിഫ് സിറ്റിയേയും വാട്‌ഫോര്‍ഡ്- ബ്രൈറ്റനേയും ക്രിസ്റ്റല്‍ പാലസ്- ഫുള്‍ഹാമിനേയും 2-0ത്തിന് പരാജയപ്പെടുത്തി. 

പരിശീലകനായി പ്രീമിയര്‍ ലീഗില്‍ അരങ്ങേറിയ മൗറീസിയോ സരിക്ക് ചെല്‍സി താരങ്ങള്‍ മികച്ച വിജയമാണ് സമ്മാനിച്ചത്. എന്‍ഗാളോ കാണ്ടെ, ജോര്‍ഗിനോ, പെഡ്രോ എന്നിവരാണ് ചെല്‍സിക്കായി വല ചലിപ്പിച്ചത്. 

യാന്‍ വെര്‍ടോന്‍ഗന്‍, ഡെലെ അലി എന്നിവരുടെ ഗോളുകളാണ് ടോട്ടനത്തിന് വിജയം സമ്മാനിച്ചത്. നേരത്തെ ആദ്യ മത്സരത്തില്‍ 2-1ന് ലെയ്‌സ്റ്റര്‍ സിറ്റിയെ പരാജയപ്പെടുത്തിയിരുന്നു.