ഗൗതം ഗംഭീറിനെ ഡല്‍ഹി ഡെയര്‍ഡെവിള്‍സ് ടീമില്‍ നിന്നും ഒഴിവാക്കിയേക്കും. അടുത്ത മാസം താര ലേലം നടക്കാനിരിക്കുന്നതിന് മുന്‍പ് ഡല്‍ഹി ഒഴിവാക്കാന്‍ നിശ്ചയിച്ചിരിക്കുന്ന താരങ്ങളുടെ ലിസ്റ്റില്‍ ഗംഭീറിന്റെ പേരുമുണ്ടെന്നാണ് മുംബൈ മിറര്‍ റിപ്പോര്‍ട്ട് ചെയ്യുന്നത്.
കഴിഞ്ഞ സീസണില്‍ കൊല്‍ക്കത്ത ഗംഭീറിനെ ഒഴിവാക്കുകയും ഡല്‍ഹി താരത്തെ സ്വന്തമാക്കുകയും ചെയ്തു. 2.80 കോടി രൂപയ്ക്കാണ് ഗംഭീറിനെ ഡല്‍ഹി പതിനൊന്നാം ഐപിഎല്‍ സീസണില്‍ ടീമിലെത്തിച്ചത്. എന്നാല്‍ ഗംഭീറിന് കീഴില്‍ ഡല്‍ഹി പരാജയങ്ങളിലേക്ക് കൂപ്പുകുത്തിയതോടെ ഗംഭീറിന്റെ നായക സ്ഥാനം നഷ്ടപ്പെട്ടു.
ശ്രേയസ് അയ്യര്‍ നായകനാവുകയും, ഗംഭീറിന് പ്ലേയിങ് ഇലവനില്‍ പോലും അവസരം ലഭിക്കാതെ വരികയും ചെയ്തു. സ്വയം മാറി നില്‍ക്കാന്‍ തീരുമാനിക്കുകയായിരുന്നു ഗംഭീര്‍ എന്നാണ് ടീം കോച്ചായ റിക്കി പോണ്ടിങ് പറഞ്ഞത്. എന്നാല്‍ അങ്ങിനെയൊരു തീരുമാനം താന്‍ എടുത്തിട്ടില്ലെന്ന് പരസ്യമായി പ്രതികരിച്ച് ഗംഭീറും മുന്നോട്ടു വന്നിരുന്നു.
ഗംഭീറിനെ കൂടാതെ, ഗ്ലെന്‍ മാക്‌സ്വെല്‍, ക്രിസ് മോറിസ്, ജാസന്‍ റോയി എന്നിവരേയും ഡല്‍ഹി ഒഴിവാക്കുമെന്നാണ് റിപ്പോര്‍ട്ട്. ഒന്‍പത് കോടി രൂപയ്ക്കും 11 കോടിക്കുമായിരുന്നു ഗ്ലെന്‍ മാക്‌സ്വെല്ലിനേയും ക്രിസ് മോറിസിനേയും ഡല്‍ഹി സ്വന്തമാക്കിയത്. എന്നാല്‍ രണ്ട് പേരില്‍ നിന്നും പ്രതീക്ഷിച്ച പ്രകടനം ഉണ്ടായില്ല.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates