ലണ്ടന്‍: വിഖ്യാത പരിശീലകന്‍ സര്‍ അലക്‌സ് ഫെര്‍ഗൂസന്‍ മാഞ്ചസ്റ്റര്‍ യുനൈറ്റഡിന്റെ പടിയിറങ്ങിയ ശേഷം വലിയ നേട്ടങ്ങളൊന്നും ക്ലബിന് വന്നിട്ടില്ല. ഒരു യൂറോപ്പ ലീഗ് കിരീടമാണ് അതിനിടെ കിട്ടിയ വലിയൊരു കിരീടം. ഫെര്‍ഗൂസന് ശേഷം ഡേവിഡ് മോയസ്, ലൂയീസ് വാന്‍ ഗാല്‍, മൗറീഞ്ഞോ തുടങ്ങിയവരൊക്കെ വന്നു. കഴിഞ്ഞ സീസണിന്റെ പകുതിയില്‍ വച്ചാണ് മൗറീഞ്ഞോയെ പുറത്താക്കുന്നത്. പകരക്കാരനായി സ്ഥാനമേറ്റ മുന്‍ താരം കൂടിയായ ഒലെ ഗണ്ണാര്‍ സോള്‍ഷ്യര്‍ തുടക്കത്തില്‍ വലിയ പ്രതീക്ഷകള്‍ നല്‍കി. ഇതോടെ ഈ സീസണിലേക്ക് സോള്‍ഷ്യറെ സ്ഥിരം പരിശീലകനായി നിയമിക്കുകയും ചെയ്തു. നടപ്പ് സീസണില്‍ മാഞ്ചസ്റ്ററിന്റെ സ്ഥിതി ദയനീയമാണ്.  

സോള്‍ഷ്യറിന് ഒത്തിണക്കമുള്ള മികച്ച ടീമായി മാഞ്ചസ്റ്ററിനെ മാറ്റിയെടുക്കാന്‍ സാധിച്ചില്ല. അതുകൊണ്ടു തന്നെ ടീമിനുള്ളില്‍ വലിയ അഴിച്ചുപണിക്കുള്ള തയ്യാറെടുപ്പിലാണ് യുണൈറ്റഡ് മാനേജ്‌മെന്റ് എന്നാണ് ഇംഗ്ലീഷ് മാധ്യമങ്ങള്‍ റിപ്പോര്‍ട്ട് ചെയ്യുന്നത്. സോള്‍ഷ്യറിനെ മാറ്റി പുതിയ പരിശീലകനെ നിയമിക്കാന്‍ ക്ലബ് തയ്യാറെടുക്കുന്നതായുള്ള വിവരം സണ്‍ അടക്കമുള്ള മാധ്യമങ്ങളാണ് പുറത്തുവിട്ടത്.

നിലവിലെ സാഹചര്യത്തില്‍ ടോട്ടനം പരിശീലകന്‍ മൗറീഷ്യോ പൊചെറ്റിനോ യുനൈറ്റഡ് പരിശീലകനാവുമെന്നാണ് പുറത്തു വരുന്ന റിപ്പോര്‍ട്ടുകള്‍ വ്യക്തമാക്കുന്നത്. ടോട്ടനം വിടാന്‍ സന്നദ്ധത അറിയിച്ച പൊചെറ്റീനോ റെഡ് ഡെവിള്‍സിനെ കളി പഠിപ്പിക്കാന്‍ താത്പ്പര്യം പ്രകടിപ്പിച്ചതായും വാര്‍ത്തകളുണ്ട്. ടോട്ടനത്തെ കഴിഞ്ഞ സീസണില്‍ ചാമ്പ്യന്‍സ് ലീഗ് ഫൈനല്‍ വരെയെത്തിച്ച പരിശീലകനാണ് പൊചെറ്റിനോ. എന്നാല്‍ സീസണില്‍ ടോട്ടനത്തിന്റെ സ്ഥിതിയും അത്ര സുഖകരമല്ല. ലീഗ് കപ്പില്‍ ദുര്‍ബലരായ ടീമിനോട് തോറ്റ് പുറത്ത് പോകേണ്ടി വന്നത് പൊചെറ്റിനോയ്ക്ക് കടുത്ത തിരിച്ചടിയായി മാറുകയായിരുന്നു. ഇതോടെ ആരാധകര്‍ പരിശീലകനെ മാറ്റണമെന്ന ആവശ്യവുമായി രംഗത്തെത്തി. 

ഈ സീസണിലെ പ്രീമിയര്‍ ലീഗില്‍ ആറ് മത്സരം കളിച്ച യുനൈറ്റഡിന് ഒരു മത്സരം മാത്രമാണ് ജയിക്കാനായത്. ലുകാകുവും അലക്‌സിസ് സാഞ്ചസും ടീം വിട്ടതിന് ശേഷം ഉത്തമ പകരക്കാരനെ കണ്ടെത്താന്‍ യുനൈറ്റഡിന് സാധിച്ചിട്ടില്ല. മധ്യനിരയില്‍ പോള്‍ പോഗ്ബയുടെ മോശം ഫോമും പരുക്കുമെല്ലാം അവരുടെ ആത്മവിശ്വാസം കെടുത്തുന്നു. എന്തായാലും സോള്‍ഷെയറിന്റെ കസേര ഉടന്‍ തന്നെ തെറിക്കുമെന്ന കാര്യം ഏറെക്കുറെ ഉറപ്പായിട്ടുണ്ട്. പകരക്കാരനായി പൊചെറ്റിനോ ഓള്‍ഡ് ട്രാഫോര്‍ഡിലെത്തുമോ എന്നാണ് ആരാധകര്‍ ഉറ്റുനോക്കുന്നത്.