വീഗോ: 33മത്തെ ലീഗ് കിരീടത്തിലേക്ക് റിയല്‍ മാഡ്രിഡിന് വേണ്ടത് ഒരു പോയിന്റ് മാത്രം. കഴിഞ്ഞ ദിവസം സെല്‍റ്റാ വീഗോയെ ഒന്നിനെതിരേ നാല് ഗോളുകള്‍ക്ക് തോല്‍പ്പിച്ചതോടെ പോയിന്റ് പട്ടികയില്‍ ബാഴ്‌സയെ രണ്ടാമതാക്കി ലോസ് ബ്ലാങ്കോസ് ഒന്നിലേക്ക് കയറി. 

10, 48 മിനുട്ടുകളില്‍ ക്രിസ്റ്റിയാനോ റൊണാള്‍ഡോയും 70മത് മിനുട്ടില്‍ ബെന്‍സേമ, 88മത് മിനുട്ടില്‍ ക്രൂസ് എന്നിവരാണ് റിയലിന് വേണ്ടി വല ചലിപ്പിച്ചത്. 70മത് മിനുട്ടില്‍ ഗ്വുഡിറ്റി സെല്‍റ്റയുടെ ഏക ഗോള്‍ നേടി.

രണ്ട് തവണ ലക്ഷ്യം കണ്ട സൂപ്പര്‍ താരം റൊണാള്‍ഡോ യൂറോപ്പിലെ     അഞ്ച് ലീഗുകളില്‍ ഏറ്റവും കൂടുതല്‍ ഗോള്‍ നേടുന്ന താരം എന്ന റെക്കോര്‍ഡ് കഴിഞ്ഞ ദിവസം സ്വന്തം പേരില്‍ കുറിച്ചു.

37 കളികളില്‍ 90 പോയിന്റുള്ള റിയലിന് ഞായറാഴ്ച മലാഗയുമായുള്ള മത്സരത്തില്‍ സമനില മതി ചാംപ്യന്‍മാരാകാന്‍. രണ്ടാം സ്ഥാനത്തുള്ള ബാഴ്‌സലോണയ്ക്ക് ഇത്രയും കളികളില്‍ നിന്ന് 87 പോയിന്റാണുള്ളത്.