സോഷ്യല്‍ മീഡിയ പ്ലാറ്റ്ഫോമുകള്‍ തമ്മിലുള്ള മത്സരവും ഉപയോക്താക്കളുടെ ചേരിതിരിവും രൂക്ഷമാകുന്നതിനിടെ, ടെക് ലോകത്ത് വീണ്ടും വിവാദത്തിന് തിരി കൊളുത്തിയിരിക്കുകയാണ് ബില്യണയര്‍ ഇലോണ്‍ മസ്‌ക്. എതിരാളികളായ പ്ലാറ്റ്ഫോമുകളെക്കുറിച്ച് എപ്പോഴും തുറന്നുപറച്ചിലുകള്‍ നടത്തുന്ന മസ്‌ക്, ജനപ്രിയ ആപ്പായ ഇന്‍സ്റ്റഗ്രാമിനെക്കുറിച്ച് വീണ്ടും നിലപാട് വ്യക്തമാക്കിയിരിക്കുന്നു - 'ഇന്‍സ്റ്റഗ്രാം പെണ്‍കുട്ടികള്‍ക്കുള്ളതാണ്.'
'ഗൈഗര്‍ ക്യാപിറ്റല്‍' (Geiger Capital) എന്ന എക്‌സ് ഉപയോക്താവ് ഇന്‍സ്റ്റഗ്രാം ആപ്പ് ഡിലീറ്റ് ചെയ്ത വിവരം പങ്കുവെച്ചുകൊണ്ട് പങ്കുവെച്ച പോസ്റ്റാണ് ഈ ചര്‍ച്ചകള്‍ക്ക് തുടക്കമിട്ടത്. 'ഔദ്യോഗികമായി ഇന്‍സ്റ്റഗ്രാം ഡിലീറ്റ് ചെയ്തു. ഇതൊരു സ്ത്രീകേന്ദ്രീകൃത ആപ്പാണ്. ഒരു പ്രയോജനവുമില്ല.' ഈ പോസ്റ്റിന് മറുപടിയായാണ് ഇലോണ്‍ മസ്‌ക് 'Instagram is for girls' എന്ന് കുറിച്ചത്.
ഇന്‍സ്റ്റഗ്രാമിനെ ലിംഗാധിഷ്ഠിതമായി മസ്‌ക് വിശേഷിപ്പിക്കുന്നത് ഇതാദ്യമല്ല. മുന്‍പ് മെയ് മാസത്തിലും സമാനമായ ഒരു ചര്‍ച്ചയില്‍ മസ്‌ക് ഈ പ്രസ്താവന നടത്തിയിരുന്നു. ദിവസേനയുള്ള സ്റ്റോറികള്‍, ഭക്ഷണത്തിന്റെ ചിത്രങ്ങള്‍, വ്യക്തിഗത വിശേഷങ്ങള്‍ എന്നിവ പങ്കുവെക്കുന്ന ശീലങ്ങളെക്കുറിച്ചുള്ള ചര്‍ച്ചയിലായിരുന്നു അന്ന് മസ്‌കിന്റെ പ്രതികരണം. മുതിര്‍ന്ന പുരുഷന്മാര്‍ തനിക്ക് ഇന്‍സ്റ്റഗ്രാം ഐഡി അയച്ചുതരുമ്പോള്‍ അവര്‍ ലിംഗമാറ്റം നടത്താന്‍ ശ്രമിക്കുകയാണോ എന്ന് സംശയിച്ചുപോകാറുണ്ടെന്നും മസ്‌ക് അന്ന് പരിഹസിച്ചിരുന്നു. ഇത് വലിയ രീതിയിലുള്ള വിമര്‍ശനങ്ങള്‍ക്കും ലിംഗവിവേചന ആരോപണങ്ങള്‍ക്കും വഴിതെളിച്ചിരുന്നു.
വാര്‍ത്തകള്‍, വിശകലനങ്ങള്‍, ടെക്, ഫിനാന്‍സ്, രാഷ്ട്രീയം എന്നിവ കേന്ദ്രീകരിച്ചാണ് മസ്‌കിന്റെ 'എക്‌സ്' പ്രവര്‍ത്തിക്കുന്നത്. എന്നാല്‍ ഇന്‍സ്റ്റഗ്രാം പ്രധാനമായും ലൈഫ്‌സ്‌റ്റൈല്‍, വിഷ്വല്‍ സ്റ്റോറിടെല്ലിങ്, ബ്രാന്‍ഡിങ് എന്നിവയിലാണ് ശ്രദ്ധ കേന്ദ്രീകരിക്കുന്നത്. ഇന്‍സ്റ്റഗ്രാം സ്ത്രീകേന്ദ്രീകൃതമാണെന്ന് മസ്‌ക് വാദിക്കുമ്പോഴും, അന്താരാഷ്ട്ര മാര്‍ക്കറ്റ് റിസര്‍ച്ച് കണക്കുകള്‍ പ്രകാരം മെറ്റയുടെ ഈ ആപ്പില്‍ എല്ലാ ലിംഗവിഭാഗങ്ങളിലുംപെട്ട കോടിക്കണക്കിന് ആളുകള്‍ സജീവമാണ്. എക്‌സിനെ വിവരശേഖരണത്തിനുള്ള വേദിയായും മെറ്റയുടെ ആപ്പുകളെ വെറും ഉപഭോക്തൃ-ലൈഫ്‌സ്‌റ്റൈല്‍ കേന്ദ്രങ്ങളായും ചിത്രീകരിക്കാനുള്ള മസ്‌കിന്റെ തന്ത്രപരമായ നീക്കത്തിന്റെ ഭാഗം കൂടിയാണ് ഈ പ്രസ്താവനകള്‍.
മസ്‌കിന്റെ പരാമര്‍ശം പുറത്തുവന്നതോടെ സോഷ്യല്‍ മീഡിയയില്‍ വാദപ്രതിവാദങ്ങള്‍ മുറുകി. ചില ഉപയോക്താക്കള്‍ മസ്‌കിന്റെ നിലപാടിനെ പിന്തുണച്ചപ്പോള്‍, ഒരു ഡിജിറ്റല്‍ പ്ലാറ്റ്ഫോമിനെ ലിംഗാധിഷ്ഠിതമായി തരംതിരിക്കുന്നതിനെ ഭൂരിഭാഗം ആളുകളും എതിര്‍ത്തു. അങ്ങനെയെങ്കില്‍ എക്‌സ് ആര്‍ക്കുള്ളതാണെന്നും ഇന്‍സ്റ്റഗ്രാം എല്ലാവര്‍ക്കും ഉപയോഗിക്കാവുന്ന പ്ലാറ്റ്ഫോം ആണെന്നും ഉപയോക്താക്കള്‍ മറുപടി നല്‍കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates