സൗത്ത് ആഫ്രിക്കയ്‌ക്കെതിരെ ടോസ് നേടിയ പാകിസ്ഥാന്‍ ബാറ്റിങ് തെരഞ്ഞെടുത്തു. കളി പുരോഗമിക്കവെ വിക്കറ്റ് സ്ലോ ആവുന്നത് മുന്‍ നിര്‍ത്തിയാണ് ആദ്യം ബാറ്റ് ചെയ്യാന്‍ തീരുമാനിച്ചതെന്ന് ടോസ് നേടിയ പാക് നായകന്‍ സര്‍ഫ്രാസ് പറഞ്ഞു. 

ടോസ് ജയിക്കുന്ന ടീമിന് തീരുമാനമെടുക്കുന്നതില്‍ ആശയക്കുഴപ്പം തീര്‍ക്കുന്ന വിധമായിരുന്നു ലോര്‍ഡ്‌സിലെ പിച്ചിന്റെ സ്വഭാവം. തെളിഞ്ഞ അന്തരീക്ഷവും, പിച്ച് ഡ്രൈയുമാണെങ്കില്‍ ലോര്‍ഡ്‌സ് ആദ്യം ബാറ്റ് ചെയ്യുന്ന ടീമിനെ തുണയ്ക്കും. മൂടിക്കെട്ടിയ അന്തരീക്ഷത്തില്‍ പേസര്‍മാരേയാവും പിച്ച് തുടക്കത്തില്‍ പിന്തുണയ്ക്കുക. 

ബാറ്റ്‌സ്മാനും, ബൗളര്‍ക്കും പിച്ചില്‍ നിന്ന് ആനുകൂല്യം ലഭിക്കുമെന്നാണ് ലോര്‍ഡ്‌സിലെ കഴിഞ്ഞ മത്സരങ്ങള്‍ തെളിയിക്കുന്നത്. മത്സരം പുരോഗമിക്കവെ സ്പിന്നര്‍മാര്‍ക്ക് ആനുകൂല്യം ലഭിക്കും. ഒരു ജയം മാത്രമാണ് സൗത്ത് ആഫ്രിക്കയ്ക്കും പാകിസ്ഥാനും ഇതുവരെ നേടാനായത്. സൗത്ത് ആഫ്രിക്കയുടെ ലോകകപ്പ് പ്രതീക്ഷകള്‍ കെട്ടടങ്ങി. പാകിസ്ഥാന്റെ മുന്‍പില്‍ നേരിയ പ്രതീക്ഷയുണ്ട്.