ധനം, ഭാഗ്യം, വരുമാനം...; അറിയാം ജാതകത്തിലെ രണ്ട്, ഒമ്പത്, പതിനൊന്ന് ഭാവങ്ങളുടെ പ്രാധാന്യം

ചില വ്യക്തികള്‍ പഠിച്ച വിഷയവുമായി ബന്ധപ്പെട്ട ജോലികള്‍ ചെയ്യുന്നു. മറ്റു ചിലര്‍ അതുമായി ഒരു ബന്ധവുമില്ലാത്ത ജോലിയായിരിക്കും ചെയ്യുന്നത്. ഭാഗ്യമുള്ളവര്‍ എന്ത് ചെയ്താലും വിജയിക്കുന്നു. ചിലര്‍ വളരെ ക്ലേശപ്പെട്ടായിരിക്കും ജീവിതം മുന്നോട്ടു കൊണ്ടുപോവുക. ജ്യോതിഷപരമായ പരിഹാരങ്ങള്‍ ചെയ്യുക, രത്‌നങ്ങള്‍ ധരിക്കുക എന്നിവയൊക്കെ പ്രതിവിധികളാണ്.

ഒരാളുടെ സാമ്പത്തിക പുരോഗതി, വിദ്യാഭ്യാസ നേട്ടം, ഭാഗ്യാനുഭവങ്ങള്‍, വരുമാനവര്‍ധന എന്നിവ വിലയിരുത്തുന്നതില്‍ ജാതകത്തിലെ രണ്ടാം ഭാവം, ഒമ്പതാം ഭാവം, പതിനൊന്നാം ഭാവം എന്നിവയ്ക്ക് വളരെ പ്രധാനപ്പെട്ട സ്ഥാനമാണുള്ളത്. ഈ മൂന്ന് ഭാവങ്ങളും പരസ്പരം ബന്ധപ്പെട്ടാല്‍ ജീവിതത്തില്‍ ശ്രദ്ധേയമായ ഉയര്‍ച്ചകളും നേട്ടങ്ങളും കൈവരിക്കാന്‍ സാധിക്കുമെന്ന് ജ്യോതിഷം സൂചിപ്പിക്കുന്നത്.

രണ്ടാം ഭാവം - വാക്ക്, വിദ്യ, ധനം

രണ്ടാം ഭാവം ധനസ്ഥാനമായാണ് അറിയപ്പെടുന്നത്. സമ്പാദ്യം, സമ്പത്ത്, കുടുംബ പശ്ചാത്തലം, വാ ക്കിന്റെ ശക്തി, വിദ്യാഭ്യാസം എന്നിവയെ ഈ ഭാവം പ്രതിനിധീകരിക്കുന്നു. ഒരാളുടെ സംസാരം, അറിവ്, പഠനശേഷി, ധനം കൈകാര്യം ചെയ്യാനുള്ള കഴിവ് എന്നിവ രണ്ടാം ഭാവത്തിലൂടെ മനസ്സിലാക്കാം.

രണ്ടാം ഭാവവും അതിന്റെ അധിപനും ശക്തമായാല്‍ വ്യക്തിക്ക് നല്ല വിദ്യാഭ്യാസം നേടാനും അറിവിലൂടെ ധനം സമ്പാദിക്കാനും കഴിയും. വാക്കിന്റെ മാധുര്യവും പ്രഭാഷണശേഷിയും എഴുത്തിലെ മികവും പലപ്പോഴും സാമ്പത്തിക നേട്ടങ്ങള്‍ക്ക് വഴിയൊരുക്കും. അതുകൊണ്ടു തന്നെ വിദ്യയും ധനവും തമ്മിലുള്ള ബന്ധം ഏറ്റവും വ്യക്തമായി പ്രകടമാകുന്ന ഭാവമാണ് രണ്ടാം ഭാവം.

ഒമ്പതാം ഭാവം- ഭാഗ്യവും പൂര്‍വ്വജന്മ പുണ്യവും

ഒമ്പതാം ഭാവം ഭാഗ്യസ്ഥാനമാണ്. പൂര്‍വ്വജന്മ പുണ്യം, ദൈവാനുഗ്രഹം, ഗുരുകടാക്ഷം, ധാര്‍മികത, ഉന്നതവിദ്യാഭ്യാസം, തീര്‍ത്ഥയാത്രകള്‍ തുടങ്ങിയവയെ ഈ ഭാവം സൂചിപ്പിക്കുന്നു. ജീവിതത്തില്‍ ചിലര്‍ക്ക് അനായാസമായി ലഭിക്കുന്ന അവസരങ്ങള്‍, ശരിയായ സമയത്ത് ലഭിക്കുന്ന സഹായങ്ങള്‍, പ്രതീക്ഷിക്കാത്ത നേട്ടങ്ങള്‍ എന്നിവ പലപ്പോഴും ഒമ്പതാം ഭാവത്തിന്റെ ശക്തിയുമായി ബന്ധപ്പെട്ടിരിക്കുന്നു.

പൂര്‍വ്വജന്മ പുണ്യഫലങ്ങള്‍ ഈ ജന്മത്തില്‍ അനുഭവിക്കാനുള്ള സാധ്യതകളും ഈ ഭാവത്തിലൂടെയാണ് വിലയിരുത്തുന്നത്. ധനം സമ്പാദിക്കാനുള്ള കഴിവിനൊപ്പം അത് അനുഭവിക്കാനുള്ള ഭാഗ്യവും ആവശ്യമാണ്. ആ ഭാഗ്യത്തിന്റെ അടിത്തറയാണ് ഒമ്പതാം ഭാവം.

പതിനൊന്നാം ഭാവം- വരുമാനവും സര്‍വ്വാഭിഷ്ട സ്ഥാനവും

പതിനൊന്നാം ഭാവം ലാഭസ്ഥാനമായും സര്‍വ്വാഭിഷ്ട സ്ഥാനമായും അറിയപ്പെടുന്നു. വരുമാനം, സാമ്പത്തിക നേട്ടം, ആഗ്രഹസാഫല്യം, ലക്ഷ്യപ്രാപ്തി, സാമൂഹിക പിന്തുണ, സുഹൃത്തുക്കള്‍ വഴി ലഭിക്കുന്ന നേട്ടങ്ങള്‍ എന്നിവയെ ഈ ഭാവം പ്രതിനിധീകരിക്കുന്നു.

ജീവിതത്തില്‍ ഒരാള്‍ നേടുന്ന യഥാര്‍ത്ഥ വരുമാനവും ലാഭവും പതിനൊന്നാം ഭാവത്തിലൂടെയാണ് വിലയിരുത്തുന്നത്. തൊഴില്‍, ബിസിനസ്, നിക്ഷേപം, പൊതുപ്രവര്‍ത്തനം തുടങ്ങിയ മേഖലകളില്‍ നിന്നുള്ള നേട്ടങ്ങള്‍ ഈ ഭാവവുമായി ബന്ധപ്പെട്ടിരിക്കുന്നു. മനസ്സിലെ ആഗ്രഹങ്ങള്‍ സഫലമാകാ നുള്ള സാധ്യതകളും പതിനൊന്നാം ഭാവത്തിന്റെ ശക്തിയെ ആശ്രയിച്ചിരിക്കുന്നു.

മൂന്ന് ഭാവങ്ങളുടെയും പരസ്പരബന്ധത്തില്‍ രണ്ടാം ഭാവം ധനത്തിന്റെയും വിദ്യയുടെയും അടിസ്ഥാനമാണ്. ഒമ്പതാം ഭാവം ആ ധനത്തെ വളര്‍ത്താനുള്ള ഭാഗ്യവും പുണ്യവും നല്‍കുന്നു. പതിനൊന്നാം ഭാവം അതിന്റെ ഫലമായി ലഭിക്കുന്ന വരുമാനത്തെയും ലാഭത്തെയും സൂചിപ്പിക്കുന്നു.

ഈ മൂന്ന് ഭാവങ്ങളും അവയുടെ അധിപന്മാരും പരസ്പരം ബന്ധപ്പെട്ടാല്‍ അറിവിലൂടെ ധനം സ മ്പാദിക്കാനും ഭാഗ്യത്തിന്റെ പിന്തുണയോടെ വരുമാനം വര്‍ധിപ്പിക്കാനും കഴിയും. വിദ്യാഭ്യാസം സാമ്പത്തിക നേട്ടങ്ങളിലേക്ക് നയിക്കുകയും പൂര്‍വ്വ ജന്മ പുണ്യം അതിന് അനുകൂല സാഹചര്യങ്ങള്‍ സൃഷ്ടിക്കുകയും ചെയ്യും. അങ്ങനെ ധനം, ഭാഗ്യം, വരുമാനം എന്നി മൂന്ന് ഘടകങ്ങളും ഒരുമിച്ച് പ്രവര്‍ത്തിക്കുന്ന അവസ്ഥയാണ് ഈ ഭാവങ്ങളുടെ ശക്തമായ ബന്ധം സൂചിപ്പിക്കുന്നത്.

ജാതകത്തില്‍ രണ്ടാം, ഒമ്പതാം, പതിനൊന്നാം ഭാവങ്ങള്‍ ശക്തമായാല്‍ വ്യക്തിക്ക് അറിവും ഭാഗ്യവും വരുമാനവും ഒരേപോലെ ലഭിച്ച് ജീവിതത്തില്‍ സാമ്പത്തിക സുരക്ഷയും സാമൂഹിക അംഗീകാരവും കൈവരിക്കാന്‍ സാധിക്കുമെന്ന് ജ്യോതിഷശാസ്ത്രം വിലയിരുത്തുന്നു.