'കനല്‍വരമ്പു കടന്ന് കാലവും കാറ്റും പുതിയ വഴികളിലേക്ക്'; അമൃതയെ നെഞ്ചോടു ചേർത്ത് ​ഗോപി സുന്ദർ; ചിത്രം വൈറൽ

​ഗായിക അമൃത സുരേഷ് ഒന്നിച്ചുള്ള ചിത്രം പങ്കുവച്ച് സം​ഗീത സംവിധായകൻ ​ഗോപി സുന്ദർ. അമൃതയെ ചേർത്തു പിടിച്ചുകൊണ്ടു നിൽക്കുന്ന ​ഗോപി സുന്ദറിന്റെ സെൽഫിയാണ് സോഷ്യൽ മീഡിയയിലൂടെ പങ്കുവച്ചത്. ഇരുവരും പ്രണയത്തിലാണെന്ന് സൂചന നൽകുന്ന ചിത്രം ഇതിനോടകം വൈറലായി. 

പിന്നിട്ട കാതങ്ങള്‍ മനസ്സില്‍ കുറിച്ച് അനുഭവങ്ങളുടെ കനല്‍വരമ്പു കടന്ന് കാലവും കാറ്റും പുതിയ വഴികളിലേക്ക്- എന്ന കുറിപ്പിനൊപ്പമാണ് ചിത്രം പോസ്റ്റ് ചെയ്തത്. 

​ഗായിക അഭയ ഹിരൺമയിയുമായി വർഷങ്ങളായി പ്രണയത്തിലായിരുന്നു ​ഗോപി സുന്ദർ. ഇവരുടെ ലിവ് ഇൻ റിലേഷൻഷിപ്പ് പലപ്പോഴും വാർത്തയാവാറുണ്ട്. അഭയ ഹിരൺമയിയുടെ പിറന്നാൾ ദിനത്തിന് തൊട്ടു പിന്നാലെയാണ് അമൃതയ്ക്കൊപ്പമുള്ള ചിത്രം ​ഗോപി സുന്ദർ പങ്കുവച്ചത്. ഹിരൺമയിക്കൊപ്പമുള്ള ചിത്രങ്ങളും സോഷ്യൽ മീഡിയയിൽ നിന്ന് നീക്കം ചെയ്തിട്ടുണ്ട്. ​ഗോപി സുന്ദറിനും അമൃത സുരേഷിനും ആശംസകൾ അറിയിച്ചുകൊണ്ടും വിമർശിച്ചുകൊണ്ടും നിരവധി കമന്റുകളാണ് പോസ്റ്റിനു താഴെ വരുന്നത്. നടൻ ബാലയുമായി വിവാഹബന്ധം വേർപെടുത്തിയ അമൃതയ്ക്ക് ഒരു മകളുണ്ട്.