വിശപ്പും മധുരത്തോട് ആസക്തിയും ഉണ്ടോ? ശരീരത്തിൽ പ്രോട്ടീൻ കുറയുന്നതിൻ്റെ 5 ലക്ഷണങ്ങൾ

നമ്മുടെ ശരീരത്തിന് ഏറ്റവും ആവശ്യമായ പോഷകഘടകമാണ് പ്രോട്ടീൻ. ശരീരത്തിന് എന്തെങ്കിലും കേടുപാടുകൾ ഉണ്ടാകുമ്പോൾ അവയെ നന്നാക്കുന്നതിനും പുതിയ കോശങ്ങൾ നിർമിക്കുന്നതിനും പ്രോട്ടീൻ സഹായിക്കുന്നു. ശരീരത്തിലെ രാസപ്രവർത്തനങ്ങൾ വേഗത്തിലാക്കുന്ന എൻസൈമുകളും, ശരീരത്തിന്റെ പ്രവർത്തനങ്ങളെ നിയന്ത്രിക്കുന്ന ഹോർമോണുകളും നിർമിച്ചിരിക്കുന്നത് പ്രോട്ടീൻ കൊണ്ടാണ്.

സാധാരണയായി ഒരു ദിവസം ഒരാൾക്ക് ശരാശരി 0.8 ഗ്രാം പ്രോട്ടീൻ ശരീരഭാരത്തിന്റെ ഓരോ കിലോഗ്രാമിനും ആവശ്യമാണ്. അതായത്, 70 കിലോഗ്രാം ഭാരമുള്ള ഒരാൾക്ക് ഒരു ദിവസം ഏകദേശം 56 ഗ്രാം പ്രോട്ടീൻ വേണ്ടിവരും. എന്നാൽ ഈ അളവ് എല്ലാവർക്കും ഒരുപോലെയല്ല. ഭാരം ഉയർത്തുന്നവർക്കും കായിക താരങ്ങൾക്കും ഒരു കിലോഗ്രാം ശരീരഭാരത്തിന് 1.2 മുതൽ 2.0 ഗ്രാം വരെ പ്രോട്ടീൻ ആവശ്യമായി വരാം. ​​

കൂടുതൽ ആരോ​ഗ്യ വാർത്തകൾ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക് ചെയ്യുക

പ്രോട്ടീൻ ശരീരത്തിൽ കുറവാണോ? ലക്ഷണങ്ങൾ

എപ്പോഴും ക്ഷീണവും ഊർജ്ജമില്ലായ്മയും

ആവശ്യത്തിന് പ്രോട്ടീൻ ലഭിക്കാത്തപ്പോൾ ശരീരത്തിന് പേശികളെ സംരക്ഷിക്കാനും ഊർജം നിലനിർത്താനും ബുദ്ധിമുട്ടാകും. ചെറിയ ജോലികൾ ചെയ്താലും തളർച്ച തോന്നുക, ദിവസം മുഴുവൻ ഉറക്കം വരിക, ശ്രദ്ധ കേന്ദ്രീകരിക്കാൻ ബുദ്ധിമുട്ടുക എന്നിവ പ്രോട്ടീൻ കുറവിന്റെ ലക്ഷണങ്ങളാകാം.

മുടികൊഴിച്ചിലും നഖം പൊട്ടലും

മുടിയും നഖങ്ങളും പ്രധാനമായും പ്രോട്ടീൻ കൊണ്ടാണ് നിർമ്മിച്ചിരിക്കുന്നത്. അതിനാൽ പ്രോട്ടീൻ കുറവുണ്ടെങ്കിൽ മുടി കനം കുറയാനും കൂടുതൽ കൊഴിയുകയും ചെയ്യാം. നഖങ്ങൾ എളുപ്പത്തിൽ പൊട്ടുകയോ പാളികളായി വേർപെടുകയോ ചെയ്യാം.

• മുടിയുടെ വളർച്ച മന്ദഗതിയിലാകുക

• മുടിക്ക് തിളക്കം കുറയുക

• നഖങ്ങൾ ദുർബലമാകുക

പേശികൾ ദുർബലമാകാം ശരീരഭാരം കുറയാം

ഭക്ഷണത്തിൽ പ്രോട്ടീൻ കുറവാണെങ്കിൽ ശരീരം ആവശ്യമായ അമിനോ ആസിഡുകൾ ലഭിക്കാൻ സ്വന്തം പേശികളിൽ നിന്ന് പ്രോട്ടീൻ ഉപയോഗിക്കാൻ തുടങ്ങും. ഇതുമൂലം പേശികളുടെ അളവ് കുറയുകയും ബലം കുറഞ്ഞതായി അനുഭവപ്പെടുകയും ചെയ്യും.

• ഭാരമുള്ള വസ്തുക്കൾ എടുക്കാൻ ബുദ്ധിമുട്ട്

• നടക്കുമ്പോൾ വേഗം ക്ഷീണിക്കുക

• പേശിവേദന

മുറിവുകൾ വൈകി ഉണങ്ങുക

മുറിവുകൾ ഉണങ്ങാനും പുതിയ കോശങ്ങൾ രൂപപ്പെടാനും പ്രോട്ടീൻ ആവശ്യമാണ്. അതിനാൽ ചെറിയ മുറിവുകൾ പോലും പതിവിലേറെ സമയം എടുത്ത് സുഖപ്പെടുന്നുണ്ടെങ്കിൽ ഭക്ഷണത്തിലെ പ്രോട്ടീന്റെ അളവ് പരിശോധിക്കുന്നത് നല്ലതാണ്. ഇത് പ്രത്യേകിച്ച് ശസ്ത്രക്രിയയ്ക്ക് ശേഷമോ പരിക്കുകൾക്ക് ശേഷമോ കൂടുതൽ ശ്രദ്ധിക്കേണ്ട കാര്യമാണ്.

വിശപ്പും മധുരത്തോടുള്ള ആസക്തിയും

പ്രോട്ടീൻ വയറുനിറഞ്ഞ തോന്നൽ കൂടുതൽ സമയം നിലനിർത്താൻ സഹായിക്കുന്നു. ഭക്ഷണത്തിൽ പ്രോട്ടീൻ കുറവാണെങ്കിൽ വളരെ വേഗം വിശക്കുകയും മധുരപലഹാരങ്ങളോ ജങ്ക് ഫുഡുകളോ കഴിക്കാനുള്ള ആഗ്രഹം കൂടുകയും ചെയ്യാം.

പ്രോട്ടീൻ അടങ്ങിയ ഭക്ഷണം

• പയർവർഗങ്ങൾ

• കടല

• ചെറുപയർ

• പനീർ

• പാൽ, തൈര്

• നിലക്കടല

• ബദാം

• മത്തങ്ങാവിത്ത്

• എള്ള്

• മാംസാഹാര ഉറവിടങ്ങൾ

• മുട്ട

• മത്സ്യം

• ചിക്കൻ

• ഇറച്ചി (മിതമായ അളവിൽ)

• ചെമ്മീൻ

ശ്രദ്ധിക്കേണ്ട മറ്റൊരു കാര്യം, 30 ഗ്രാമില്‍ കൂടുതല്‍ പ്രോട്ടീന്‍ ഒരേസമയം നമ്മുടെ ശരീരത്തിന്റെ ദഹനവ്യവസ്ഥക്ക് ദഹിപ്പിക്കാനും സാധിക്കില്ല. അതു കൊണ്ട് തന്നെ 50 ഗ്രാമില്‍ കൂടുതല്‍ പ്രോട്ടീന്‍ ശരീരത്തില്‍ എത്തിയാല്‍ അത് ഉപയോഗിക്കപ്പെടാതെ പോകുകയാണ് ചെയ്യുക.