ഇഡ്ഡലി ബാക്കിയായോ? കളയല്ലേ, കിടിലൻ ചില്ലി ഇഡ്ഡലി വീട്ടിൽ തയ്യാറാക്കാം...

വീട്ടിൽ പ്രഭാതഭക്ഷണത്തിന് തയ്യാറാക്കിയ ഇഡ്ഡലി ബാക്കിവരാറുണ്ടോ? സാധാരണ ഇഡ്ഡലി വീണ്ടും ചൂടാക്കി കഴിക്കുന്നതിന് പകരം രുചികരമായ മറ്റൊരു വിഭവം ഉണ്ടാക്കാം. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടാൻ സാധ്യതയുള്ള വിഭവമാണ് ചില്ലി ഇഡ്ഡലി. സവാളയും കാപ്സിക്കവും വിവിധ മസാലകളും ചേർത്ത് തയ്യാറാക്കുന്ന ഈ വിഭവം വൈകുന്നേരത്തെ ചായയ്ക്കൊപ്പവും കഴിക്കാം. ഹോട്ടലുകളിൽ ലഭിക്കുന്ന ചില്ലി ഇഡ്ഡലി വീട്ടിലും എളുപ്പത്തിൽ എങ്ങനെ ആണ് തയ്യാറാക്കുന്നത് എന്ന് നോക്കാം.

ആരോ​ഗ്യ വാർത്തകൾ കൂടുതൽ അറിയാൻ വാട്സ്ആപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

ആവശ്യമായ ചേരുവകൾ

• ബാക്കിവന്ന ഇഡ്ഡലി – 6 എണ്ണം

• സവാള – 1 എണ്ണം

• കാപ്സിക്കം – അരക്കപ്പ് (ഏകദേശം 50–75 ഗ്രാം)

• പച്ചമുളക് – 1 എണ്ണം

• ഇഞ്ചി, വെളുത്തുള്ളി അരിഞ്ഞത് – 1 ടീസ്പൂൺ

• തക്കാളി സോസ് – 1 ടേബിൾ സ്പൂൺ

• സോയ സോസ് – 1 ടീസ്പൂൺ

• കുരുമുളകുപൊടി – അര ടീസ്പൂൺ

• മുളകുപൊടി – കാൽ ടീസ്പൂൺ (ആവശ്യത്തിന്)

• എണ്ണ – 1 മുതൽ 2 ടേബിൾ സ്പൂൺ വരെ

• ഉപ്പ് – ആവശ്യത്തിന്

• സ്പ്രിങ് ഒനിയൻ അല്ലെങ്കിൽ മല്ലിയില – ആവശ്യത്തിന്.

തയ്യാറാക്കുന്ന വിധം

• ആദ്യം ഇഡ്ഡലി ചെറിയ ചതുരക്കഷ്ണങ്ങളായി മുറിച്ചെടുക്കുക.

• ഇഡ്ഡലി അധികം മൃദുവാണെങ്കിൽ കുറച്ചുനേരം ഫ്രിഡ്ജിൽ വെച്ചശേഷം മുറിക്കുന്നത് എളുപ്പമായിരിക്കും.

• ഒരു പാനിൽ അൽപ്പം എണ്ണയൊഴിച്ച് ഇഡ്ഡലി കഷ്ണങ്ങൾ ചെറുതായി മൊരിച്ചെടുക്കുക. ശേഷം ഇഡ്ഡലി മാറ്റിവയ്ക്കുക.

• അതേ പാനിൽ ബാക്കിയുള്ള എണ്ണ ഒഴിച്ച് ഇഞ്ചിയും വെളുത്തുള്ളിയും ചേർത്ത് വഴറ്റുക.

• ഇതിലേക്ക് നീളത്തിൽ അരിഞ്ഞ സവാളയും പച്ചമുളകും കാപ്സിക്കവും ചേർക്കാം.

• പച്ചക്കറികൾ അധികം വെന്തുപോകാതെ രണ്ടോ മൂന്നോ മിനിറ്റ് വഴറ്റിയെടുക്കണം.

• ശേഷം തക്കാളി സോസ്, സോയ സോസ്, കുരുമുളകുപൊടി, ആവശ്യത്തിന് ഉപ്പ് എന്നിവ ചേർത്ത് നന്നായി ഇളക്കുക.

• ഇനി മൊരിച്ചുവച്ച ഇഡ്ഡലി കഷ്ണങ്ങൾ ചേർത്ത് മസാലകൾ എല്ലായിടത്തും പിടിക്കുന്നതുവരെ ഇളക്കുക.

• ഒന്നോ രണ്ടോ മിനിറ്റ് ചെറിയ തീയിൽ ചൂടാക്കിയശേഷം അടുപ്പിൽനിന്ന് മാറ്റാം.

• അവസാനം മല്ലിയിലയോ സ്പ്രിങ് ഒനിയനോ വിതറി ചൂടോടെ വിളമ്പാം.

• കുറഞ്ഞ ചെലവിൽ ബാക്കിവന്ന ഇഡ്ഡലി ഉപയോഗിച്ച് തയ്യാറാക്കാവുന്ന രുചികരമായൊരു സ്നാക്കാണിത്.