ഹൃദയാഘാതം വരാതെ സൂക്ഷിക്കാൻ, ശീലിക്കേണ്ട അഞ്ച് കാര്യങ്ങൾ

ഹൃദയാഘാത സാധ്യത പ്രായമായവരിൽ മാത്രമല്ല, ചെറുപ്പക്കാരിലും ഇന്ന് വർധിച്ചുവരുന്നതായാണ് റിപ്പോർട്ടുകൾ സൂചിപ്പിക്കുന്നത്. അതിന്റെ പ്രധാന കാരണം നമ്മുടെ ജീവിതശൈലിയിൽ വന്ന മാറ്റങ്ങളാണെന്ന് ആരോ​ഗ്യവിദ​ഗ്ധർ ചൂണ്ടിക്കാണിക്കുന്നു. തിരക്കും സമ്മർദവും ഹൃദയാരോ​ഗ്യത്തെ ബാധിക്കാനും ആരോ​ഗ്യം മോശമാക്കുകയും ചെയ്യു. ഹൃദയാരോ​ഗ്യം മെച്ചപ്പെടുത്തി ഹൃദയാഘാത സാധ്യത കുറയ്ക്കുന്നതിന് അ‍ഞ്ച് ടിപ്സ് ഇതാ:

ഭക്ഷണശേഷമുള്ള നടത്തം

ഭക്ഷണം കഴിച്ച ശേഷം 10-15 മിനിറ്റ് നടക്കുന്നത്, നിങ്ങളുടെ ഹൃദയാരോ​ഗ്യത്തിന് ഏറെ ​ഗുണം ചെയ്യും. ഇത് ഭക്ഷണത്തിന് ശേഷമുള്ള രക്തത്തിലെ പഞ്ചസാര നിയന്ത്രിക്കാനും കൊളസ്ട്രോൾ കുറയ്ക്കാനും സഹായിക്കുന്നു.

ഇത് അധിക കലോറി കത്തിച്ചു ശരീരഭാരം നിയന്ത്രിക്കാനും സഹായിക്കുന്നു. പ്രത്യേകിച്ച് 30 വയസ്സിന് ശേഷമുള്ള ആളാണെങ്കിൽ. രാവിലെയും ഉച്ചയ്ക്കും വൈകുന്നേരവും ഭക്ഷണം കഴിച്ചശേഷം മിതമായ വേ​ഗത്തിൽ 15 മിനിറ്റ് നടക്കുന്ന ഹൃദയാരോ​ഗ്യത്തിന് നല്ലതാണ്.

ഉറക്കം ഒഴിവാക്കരുത്

തുടർച്ചയായി ഉറക്കം ഒഴിവാക്കുന്നത് ഹൃദയാരോ​ഗ്യത്തെ ബാധിക്കാനിടയാക്കും. ദിവസവും രാത്രി ഏഴ് മുതൽ എട്ട് മണിക്കൂർ ഉറക്കം ഉറപ്പാക്കണം. വൈകി ഉറങ്ങുന്നതും ഉണരുന്നതും അതേപോലെ തന്നെ അപകടമാണ്. രാത്രി പത്ത് മണിയോടെ ഉറങ്ങി ആറ് മണിക്കുള്ളിൽ ഉണരാൻ ശ്രമിക്കുക അങ്ങനെ തന്നെ ഹൃദ്രോ​ഗത്തിനുള്ള സാധ്യത കുറയ്ക്കാം. സ്ഥിരമായി ഉറക്ക-ഉണ‍ർവ് ചക്രം പിന്തുടരുന്നതാണ് എപ്പോഴും നല്ലതെന്ന് ആരോ​ഗ്യവിദ​ഗ്ധർ പറയുന്നു.

പ്ലാസ്റ്റിക് ഒഴിവാക്കുക

നിത്യ ജീവിതത്തിൽ നിന്ന് പ്ലാസ്റ്റിക് പരമാവധി ഒഴിവാക്കുന്നത് ഹൃദ്രോ​ഗ സാധ്യത കുറയ്ക്കാൻ സഹായിക്കുമെന്ന് ആരോ​ഗ്യ വി​ദ​ഗ്ധർ ചൂണ്ടിക്കാണിക്കുന്നു. ചൂടു ഭക്ഷണം പ്ലാസ്റ്റിക് പാത്രങ്ങളിൽ സൂക്ഷിക്കുന്നത് വിഷാംശമടങ്ങിയ പദാർത്ഥങ്ങൾ ഭക്ഷണത്തിൽ കലരാനും രക്തം ക്ലോട്ട് ചെയ്യാനും കാരണമാകും. ഇത് ഹൃദയാരോ​ഗ്യം മോശമാകാനും സാധ്യത കൂടുതലാണ്.

ഒമേഗ-3 ഫാറ്റി ആസിഡ്

ഒമേഗ-3 ഫാറ്റി ആസിഡ് അടങ്ങിയ ഭക്ഷണങ്ങൾ ഹൃദയാരോ​ഗ്യത്തിന് വളരെ പ്രധാനമാണ്. ഒമേഗ-3 ഫാറ്റി ആസിഡ് അടങ്ങിയ മത്സ്യം, ഒലീവ് ഓയിൽ ഒക്കെ ഡയറ്റിൽ ഉൾപ്പെടുത്തുന്നത് ഹൃദ്രോ​ഗ സാധ്യത കുറയ്ക്കാൻ സഹായിക്കുന്നതാണ്. ഡോക്ടറുടെ നിർദേശ പ്രകാരം മാത്രം ഒമേഗ-3 ഫാറ്റി ആസിഡ് സപ്ലിമെന്റ് കഴിക്കാവുന്നതാണ്.

പച്ചക്കറികളും പഴങ്ങളും ധാന്യങ്ങളും പയറുവർ​ഗവും നട്സും ഉൾപ്പെടുത്തിയ ഡയറ്റ് ഹൃദയാരോ​ഗ്യം മെച്ചപ്പെടുത്താൻ സഹായിക്കും. അതേസമയം, അമിതമായി വറുത്ത ഭക്ഷണങ്ങൾ, ട്രാൻസ് ഫാറ്റ്, പ്രോസസ്സ് ചെയ്ത ഭക്ഷണങ്ങൾ, പഞ്ചസാര കൂടുതലുള്ള പാനീയങ്ങൾ എന്നിവ പരമാവധി ഒഴിവാക്കണം. ഉപ്പിന്റെ അളവ് നിയന്ത്രിക്കുന്നതും രക്തസമ്മർദം കുറയ്ക്കാൻ സഹായിക്കും.

രക്തപരിശോധന

രക്തപരിശോധന ചെയ്ത് ആരോ​ഗ്യസ്ഥിതി നിരീക്ഷിക്കുക. സാധാരണ കൊളസ്ട്രോൾ നോർമൽ ആണെങ്കിൽ ആരോ​ഗ്യസ്ഥിതി ശരിയാണെന്ന് തെറ്റിദ്ധരിക്കാറുണ്ട്. 30 വയസ്സിന് ശേഷമുള്ളവരാണെങ്കിൽ, നിങ്ങളുടെ കുടുംബത്തിൽ ഹൃദ്രോ​ഗ ചരിത്രമുണ്ടെങ്കിൽ ലിപ്പോപ്രോട്ടീൻ (a), അപോളിപ്പോപ്രോട്ടീൻ ബി, ട്രൈഗ്ലിസറൈഡ്, LDL എന്നീ പരിശോധനകൾ നടത്തണം.