ശരീരത്തിന്റെ ഫിറ്റ്നസ് നിലനിർത്താൻ നടത്തം മാത്രം മതിയോ?

എല്ലാവര്‍ക്കും ചെയ്യാവുന്ന ഏറ്റവും ലളിതമായ വ്യായാമമാണ് നടത്തം. പുലര്‍ച്ചെ വാക്ക് വേയും റോഡും രാവിലെ നടത്തക്കാരെ (Morning Walking) കൊണ്ടു നിറയും. ശരീരഭാരം കുറയ്ക്കാന്‍ ആഗ്രഹിക്കുന്നവരും പ്രമേഹ രോഗികളും അങ്ങനെ അക്കൂട്ടത്തില്‍ ആവശ്യക്കാര്‍ പലതരത്തിലാണ്. എന്നാല്‍ മൊത്തത്തിലുള്ള ഫിറ്റ്‌നസിന് ഇങ്ങനെ നടന്നാല്‍ മതിയോ?

പതിവായി രാവിലെ നടക്കുന്നത് ശാരീരികവും മാനസികവുമായും ​ഗുണം ചെയ്യും. നടത്തം നിങ്ങളുടെ ഹൃദയാരോ​ഗ്യം, ശരീരഭാരം നിയന്ത്രിക്കൽ, പേശികളുടെയും അസ്ഥികളുടെയും ബലം മെച്ചപ്പെടുത്തൽ, സന്ധി വേദന ശമിപ്പിക്കൽ, മെച്ചപ്പെട്ട സ്റ്റാമിന, വഴക്കം എന്നിവ മെച്ചപ്പെടുത്തും. മാത്രമല്ല, സമ്മർദം കുറയ്ൽ, മെച്ചപ്പെട്ട മാനസികാവസ്ഥ, മെച്ചപ്പെട്ട വൈജ്ഞാനിക പ്രവർത്തനം, മികച്ച ഉറക്കം എന്നിവയ്ക്കും ​ഗുണകരമാണ്. ഇത് മൊത്തത്തിലുള്ള ആരോ​ഗ്യത്തെ മെച്ചപ്പെടുത്താൻ സഹായിക്കും.

കുറഞ്ഞത് 30 മിനിറ്റെങ്കിലും വേഗത്തിലുള്ള നടത്തം മികച്ച ഫിറ്റ്നസിന് സഹായിക്കും. ഇത് ഒറ്റനേരം ചെയ്യണമെന്നില്ല. ദിവസത്തിൽ 15 അല്ലെങ്കിൽ 10 മിനിറ്റുകളാണ് വിഭജിച്ചു ചെയ്യാവുന്നതാണ്.

ഫിറ്റ്നസ് നിലനിർത്താൻ നടത്തം പോരെന്നാണ് ആരോ​ഗ്യവിദ​ഗ്ധർ പറയുന്നത്. ദീർഘകാല സുസ്ഥിര ആരോ​ഗ്യത്തിനായി ഒരു മികച്ച ദിനചര്യ വികസിപ്പിക്കുന്നതിന്, ശക്തി പരിശീലനം, വഴക്കം, സന്തുലിതാവസ്ഥ എന്നിവ ഉൾക്കൊള്ളുന്ന മറ്റ് വ്യായാമങ്ങളും ചേർക്കണം.

നടത്തം വളരെ ​ഗുണകരമായ വ്യായാമമാണെങ്കിലും, കൂടുതൽ തീവ്രമായ വ്യായാമങ്ങൾ ശാരീരികക്ഷമത, പേശികളുടെ ശക്തി, ശരീരഭാരം കുറയ്ക്കൽ എന്നിവയിൽ മികച്ച പുരോഗതിയിലേക്ക് നയിക്കും. നടത്തം ദൈനംദിന ഷെഡ്യൂളിൽ ഉൾപ്പെടുത്താൻ എളുപ്പമാണ് എന്നാൽ സാധാരണയായി നടത്തം ഉയർന്ന തീവ്രതയുള്ള വ്യായാമങ്ങളുമായി ചേർന്നു ചെയ്യുന്നത് മികച്ച ഫലം നൽകും.

നടത്തം പതിവാക്കുന്നതോടെ ഇത് നിങ്ങളുടെ ശീലമാകും. സം​ഗീതം ആസ്വദിച്ചു കൊണ്ട് നടക്കുന്നതോ, സുഹൃത്തിനൊപ്പം നടക്കുന്നതോ വ്യായാമത്തെ കൂടുതൽ ആസ്വദ്യകരമാക്കും. മോശം കാലാവസ്ഥയിൽ ട്രെഡ്മില്ലിൽ നടക്കുക, ഇൻഡോർ ട്രാക്ക് അല്ലെങ്കിൽ സൈക്ലിങ് പോലുള്ള ഇതര ഇൻഡോർ കാർഡിയോ പ്രവർത്തനങ്ങൾ കണ്ടെത്തുക.