ന്യൂഡല്‍ഹി: രാജസ്ഥാന്‍ റോയല്‍സ് ക്യാപ്റ്റനും മലയാളി താരവുമായ സഞ്ജു സാംസണ്‍ ചെന്നൈ സൂപ്പര്‍ കിങ്‌സിലേക്ക് ചുവടുമാറ്റിയേക്കും എന്ന് സൂചന. ഇന്‍സ്റ്റഗ്രാമില്‍ രാജസ്ഥാന്‍ റോയല്‍സിനെ സഞ്ജു അണ്‍ഫോളോ ചെയ്തതോടെയാണ് ആരാധകര്‍ക്കിടയില്‍ ചര്‍ച്ച ചൂടുപിടിക്കുന്ന്.
ചെന്നൈ സൂപ്പര്‍ കിങ്‌സിന്റെ ഇന്‍സ്റ്റാ അക്കൗണ്ട് സഞ്ജു ഫോളോ ചെയ്യാനും ആരംഭിച്ചിട്ടുണ്ട്. കഴിഞ്ഞ സീസണില്‍ സഞ്ജുവാണ് രാജസ്ഥാന്‍ റോയല്‍സിനെ നയിച്ചത്. എന്നാല്‍ ഏഴാമതായാണ് രാജസ്ഥാന്‍ ഫിനിഷ് ചെയ്തത്. 14 കളിയില്‍ ജയിക്കാനായത് അഞ്ച് എണ്ണത്തില്‍ മാത്രം. 9 കളിയില്‍ തോറ്റു.
2022ലെ ഐപിഎല്‍ സീസണിന് മുന്‍പായി മെഗാ താര ലേലം നടക്കും. നാല് കളിക്കാരെയാണ് ഓരോ ടീമിനും ലേലത്തിന് മുന്‍പായി ടീമില്‍ നിലനിര്‍ത്താന്‍ കഴിയുക. എന്നാല്‍ രാജസ്ഥാന്‍ റോയല്‍സിന്റെ റീടെയ്ന്‍ ലിസ്റ്റില്‍ സഞ്ജുവിന്റെ പേര് ഉണ്ടാവുമോ എന്ന ചോദ്യമാണ് ഇപ്പോള്‍ ഉയരുന്നത്.
രാജസ്ഥാന്‍ സീസണ്‍ അവസാനിപ്പിച്ചത് ഏഴാമതായി
ബെന്‍ സ്‌റ്റോക്ക്‌സ്, ജോഫ്രാ ആര്‍ച്ചര്‍, ജോസ് ബട്ട്‌ലര്‍ എന്നിവര്‍ വിട്ടുനിന്നതിനെ തുടര്‍ന്ന് രാജസ്ഥാന്‍ റോയല്‍സിന് സീസണില്‍ വലിയ തിരിച്ചടിയേറ്റിരുന്നു. മികച്ച കളിക്കാരെ കൊണ്ടുവരുന്നതില്‍ ടീം പരാജയപ്പെട്ടിരുന്നു എന്ന വിമര്‍ശനങ്ങളും ശക്തമായിരുന്നു.
നിലവില്‍ കേരളത്തിന് വേണ്ടി സയിദ് മുഷ്താഖ് അലി ട്രോഫി കളിക്കുകയാണ് സഞ്ജു. കേരളത്തെ നയിക്കുന്നതും സഞ്ജുവാണ്. ഡിസംബറിലാണ് ഐപിഎല്‍ പതിനഞ്ചാം സീസണിന് മുന്‍പായുള്ള താര ലേലം. 10 ടീമുകളാണ് അടുത്ത സീസണ്‍ മുതല്‍ ഐപിഎല്ലില്‍ ഉണ്ടാവുക.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
