തുറവൂര്‍: ആലപ്പുഴ തുറവൂരില്‍ ഇടഞ്ഞോടി ചതുപ്പില്‍ പെട്ട ആനയെ കരയിലെത്തിച്ചു. പുലര്‍ച്ചെ നാലു മണിക്കു ചതുപ്പില്‍ പെട്ട ആനയെ 17 മണിക്കൂര്‍ നീണ്ട പരിശ്രമത്തിനൊടുവിലാണ് രക്ഷപ്പെടുത്തിയത്.
തിരിവിതാംകൂര്‍ ദേവസ്വം ബോര്‍ഡിന്റെ ഉടമസത്ഥതയിലുള്ള മുല്ലക്കല്‍ ബാലകൃഷ്ണന്‍ എന്ന ആനയാണ് വളമംഗലം അനന്തന്‍കരയില്‍ ചതുപ്പില്‍ താഴ്ന്നു പോയത്.
രക്ഷാ പ്രവര്‍ത്തനത്തിനിടെ തീര്‍ത്തും അവശനായ ആനയ്ക്കു ഗ്ലൂക്കോസും മരുന്നും ഇടയ്ക്കിടെ നല്‍കിയാണ് രക്ഷാ പ്രവര്‍ത്തനം നടത്തിയിരുന്നത്. പ്രദേശത്തു മൊത്തം ചതുപ്പായതിനാല്‍ ക്രെയിന്‍ എത്തിക്കാന്‍ സൗകര്യമുണ്ടായിരുന്നില്ല എന്നതാണ് രക്ഷാപ്രവര്‍ത്തനം വൈകിപ്പിച്ചത്.
നിരവധി തവണ കരയ്ക്കു കയറ്റാന്‍ ശ്രമിച്ചെങ്കിലും പരാജയപ്പെട്ടിരുന്നു. പിന്നീട് എലിഫന്റ് റെസ്‌ക്യൂ സംഘം വന്നതോടെ ആനയെ അല്‍പ്പം കരയിലേക്കു കയറ്റാന്‍ സാധിച്ചിരുന്നു.
തൃക്കാക്കര അമ്പലത്തിലെ ഉത്സവത്തിനു ശേഷം ആലപ്പുഴ മുല്ലയ്ക്കല്‍ ക്ഷേത്രത്തിലേക്കു കൊണ്ടുപോകും വഴിയാണ് ലോറിയില്‍ നിന്നും ആന ഇറങ്ങിയോടിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
