കൊച്ചി: നടിയെ ആക്രമിച്ച കേസില് അതിജീവിതക്കൊപ്പമെന്ന് സര്ക്കാര് ഹൈക്കോടതിയില്. കോടതിയുടെ മേല്നോട്ടത്തില് അന്വേഷണം വേണമെന്ന നടിയുടെ ആവശ്യത്തില് അനുകൂല നിലപാട് ആണെന്നും സര്ക്കാര് കോടതിയെ അറിയിച്ചു. അതിജീവിത നല്കിയ ഹര്ജിയില് നല്കിയ മറുപടിയിലാണ് സര്ക്കാര് ഇക്കാര്യം വ്യക്തമാക്കിയത്.
നടിയെ ആക്രമിച്ച ദൃശ്യങ്ങളടങ്ങിയ മെമ്മറി കാര്ഡ് രണ്ടുവട്ടം തുറന്നു എന്നുള്ള ഫോറന്സിക് സയന്സ് ലാബിലെ റിപ്പോര്ട്ടും സര്ക്കാര് കോടതിയെ അറിയിച്ചു. 2018 ല് കോടതി ആവശ്യത്തിനല്ലാതെ, മെമ്മറി കാര്ഡിന്റെ ഹാര്ഷ് വാല്യു രണ്ടു വട്ടം മാറിയെന്ന് പ്രാഥമിക പരിശോധനയില് വ്യക്തമായി. 2018 ജനുവരി 09, ഡിസംബര് 13 നുമാണ് മെമ്മറി കാര്ഡുകള് തുറന്നത്. എന്നാല് ഇക്കാര്യത്തില് ക്രൈംബ്രാഞ്ച് നല്കിയ ഹര്ജി കോടതി തള്ളിക്കളയുകയാണ് ചെയ്തത്.
ഹര്ജി തള്ളിയ കാര്യം രഹസ്യമാക്കി വെച്ചെന്നും, അന്വേഷണ ഉദ്യോഗസ്ഥരെയോ പ്രോസിക്യൂഷനെയോ അറിയിച്ചില്ലെന്നും സര്ക്കാര് മറുപടിയില് പറയുന്നു. നടി ആക്രമിക്കപ്പെടുന്ന ദൃശ്യങ്ങളുടെ പകർപ്പ് ദിലീപിന്റെ കൈവശമുണ്ടെന്ന വാദവും ആവർത്തിച്ചിട്ടുണ്ട്. ദിലീപിന്റെ ഫോണില് നിന്നും പിടിച്ചെടുത്ത രേഖകള് പരിശോധിക്കാന് കൂടുതല് സാവകാശം വേണമെന്നും സര്ക്കാര് ആവശ്യപ്പെട്ടു.
അന്വേഷണസംഘത്തിന് മേല് ഒരു ഇടപെടലും ഉണ്ടായിട്ടില്ല. സത്യസന്ധമായിട്ടാണ് അന്വേഷണം നടക്കുന്നത്. തുടക്കം മുതലേ അതിജീവിതയെ വിശ്വാസത്തിലെടുത്തുകൊണ്ടുള്ള അന്വേഷണമാണ് നടക്കുന്നതെന്നും സര്ക്കാര് കോടതിയെ അറിയിച്ചു. നടിയെ പീഡിപ്പിച്ച കേസില് തുടരന്വേഷണം പൂര്ത്തിയാക്കാന് മൂന്നു മാസം കൂടി സമയം തേടി സര്ക്കാര് നല്കിയ ഹര്ജി ഹൈക്കോടതി ഇന്നു വാദം കേള്ക്കും. വിചാരണക്കോടതിയില് റിപ്പോര്ട്ട് നല്കാന് ഹൈക്കോടതി അനുവദിച്ചിരുന്ന സമയം 30 ന് അവസാനിച്ചിരുന്നു.
ഈ വാർത്ത കൂടി വായിക്കാം
സമകാലിക മലയാളം ഇപ്പോൾ വാട്ട്സ്ആപ്പിലും ലഭ്യമാണ്. ഏറ്റവും പുതിയ വാർത്തകൾ അറിയാൻ ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ