(പ്രക്ഷേപകനും എഴുത്തുകാരനുമായ എസ്. ഗോപാലകൃഷ്ണന് എഫ്.ബിയില് പോസ്റ്റുചെയ്ത 'അപരിചിതരിലെ അക്ഷയഖനികള്' എന്ന അനുഭവക്കുറിപ്പിന്റെ തുടരെഴുത്ത്)
ദുബായ് മാള്
കിനോകുന്യാ പുസ്തകശാല
സന്ധ്യ
ഇവാന് ഇസ്ബെല്ലിന്റെ
ദ റെക്കോഡിങ്ങ് ഏഞ്ചല്
എന്ന പുസ്തകം ശബ്ദാലേഖം
മനുഷ്യസംസ്കാരത്തെ
മാറ്റിപ്പണിഞ്ഞതിന്റെ
ചരിത്രം കയ്യില് വച്ച്
താലോലിച്ചൊറ്റയ്ക്കൊരാള്
നില്ക്കുന്നു, നിശബ്ദത്തില്.
യവനശില്പംപോലെ
സുന്ദരനാരോ തന്റെ
പിന്നിലുണ്ടായിരുന്നോ?
അറിഞ്ഞില്ലയാള്; സ്വച്ഛം
ഒഴുകിയിറങ്ങുന്ന
താടിയില് വിരല്മീട്ടി
യവനന് മന്ത്രിക്കുന്നു:
'പുസ്തകം തുറന്നോളൂ
എണ്പത്തിമൂന്നാം പേജി
ലേറ്റവും മുകളിലെ
ഖണ്ഡിക വായിച്ചോളൂ'
ആഴക്കിണറില്നിന്ന്
പൊന്തിവരുംപോലുള്ള
ശബ്ദമൂകത വീണ്ടും:
'പ്ലേറ്റോ കുറിച്ചുവച്ച
വാചകമുണ്ടവിടെ:
പെട്ടെന്ന് അഡ്രിനാലിന്
ഉദ്ദീപിപ്പിക്കലല്ല,
ജീവിതമുടനീളം
സ്ഥായിയായ് തുടരുന്ന
ശാന്തവിസ്മയങ്ങളെ
സൃഷ്ടിക്കലാണ് കല'
സ്വപ്നത്തിലെന്നോണം ആ
പുസ്തകം തുറക്കുന്നു
അതേ പേജ് അതേ വരി!
മുഴുവന് വായിക്കാ,താ
യവനരൂപത്തിനായ്
തിരിഞ്ഞു നോക്കുമ്പോഴേ
ക്കിരമ്പുന്നിരുള് മാത്രം...
ദുബായ് മാള്
കിനോകുന്യാ പുസ്തകശാല
രാത്രി
ദൂരത്ത് തീ പോല് ബൂര്ജ് ഖലീഫ
അമാനവ സ്വപ്നാംബരത്തിന്നറ്റം
* ലോകനഗരങ്ങളില് പടര്ന്ന ജാപ്പനീസ്
പുസ്തകശാലാ ശൃംഖല.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ