'നിന്റെ കാല്‍പ്പാദങ്ങള്‍'- പാബ്ലോ നെരൂദയുടെ കവിത (പരിഭാഷ : രാംമോഹന്‍ പാലിയത്ത്) 

നിന്റേയീ മുഖത്തേയ്ക്ക് നോക്കുവാന്‍ പറ്റാത്തപ്പോള്‍
നിന്റെയീ കാല്‍പ്പാദങ്ങള്‍ നോക്കുവാനെനിക്കിഷ്ടം.
നിന്റെ കാല്‍പ്പാദത്തിന്റെ ഉള്‍ക്കുഴി കമാനാസ്ഥി
നിന്റെ കാല്‍പ്പാദത്തിന്റെ ഉറപ്പും ചെറുപ്പവും
നിന്നെ ആവഹിക്കുന്ന പാദങ്ങള്‍; അടിമുടി
മധുരം വഹിക്കുന്ന നിന്റെ ഭാരത്തെത്താങ്ങി
നീയിപ്പോള്‍ എഴുന്നേറ്റു നില്‍ക്കുന്നതതിലല്ലോ.

നിന്റെയീ അരക്കെട്ട്, ഇരട്ട മാന്‍കുട്ടികള്‍,
കുടപ്പന്‍ നിറമുള്ള ഞെട്ടുകള്‍, ചിറകുള്ള
കണ്ണുകള്‍, പിടയ്ക്കുന്ന കണ്ണുകള്‍, മധുരിക്കും
നീണ്ട വായ്, ചുരുള്‍മുടി,
നീയാകുമീ ഗോപുരം.

എങ്കിലും നിന്‍ പാദങ്ങളാണെനിയ്ക്കതിപ്രിയം
ഈ മണ്ണില്‍ ചവിട്ടി നീ കാലദൂരങ്ങള്‍ താണ്ടി
എന്നിലേയ്ക്കണഞ്ഞത് അവയാല്‍ നടന്നല്ലോ.
.......................

പാബ്ലോ നെരൂദയുടെ യുവര്‍ ഫീറ്റ് എന്ന കവിത