'മഞ്ഞവര എങ്ങോട്ടാണ് പോകുന്നത്?'- ബിജു റോക്കി എഴുതിയ കവിത

ആവിപറക്കുന്ന നടുറോട്ടില്‍
മഞ്ഞവരയെ പെറ്റിട്ട്
ബ്രഷ് നീങ്ങുന്നു.

ഇടവിട്ട് മഞ്ഞവരയെ
അഴിച്ചുവിടുകയാണ്.

അതിനിടയില്‍ വരയ്ക്കാതെ
കറുപ്പ് വരയും ഇടംപിടിക്കുന്നു.

പച്ചപെയിന്റ് പാത്രത്തില്‍നിന്ന്
സ്വതന്ത്രയായി
മഞ്ഞവര
റോട്ടില്‍ ഇഴയുന്നു.

റോഡിന് ഇരുപുറം
തലയുയര്‍ത്തിയ മരങ്ങള്‍ മഞ്ഞവരയെ നോക്കുന്നു.

റോഡ്, മഞ്ഞവര...
മഞ്ഞവര, റോഡ്.

ജീവിതം
നീണ്ട മഞ്ഞച്ചേരയായി ഇഴയുന്നു.

ഭൂമിയുടെ ഒരറ്റം മുതല്‍ മറ്റേയറ്റം വരെ
മഞ്ഞവര.

മഞ്ഞവര... റോഡ്...
റോഡ്, മഞ്ഞവര

വരച്ചുചൂടാറാത്ത മഞ്ഞവരയില്‍
ചെവിതറ്റുപോയ പട്ടി  മണത്തുനോക്കുന്നു.

പട്ടിയുടെ കണ്ണില്‍ തിളങ്ങുന്ന ഗോളം.

അതില്‍
മഞ്ഞവര, റോഡ്
റോഡ്, മഞ്ഞവര.