'വിസില്‍'- മോഹനകൃഷ്ണന്‍ കാലടി എഴുതിയ കവിത

1
ഈ മഴയൊന്ന് മാറിക്കിട്ടിയാല്‍വെയിലുകൊണ്ടൊരു തുലാഭാരം നടത്തണം;
സമയമുണ്ടെങ്കില്‍ പശ്ചിമഘട്ടത്തിന് ചുറ്റുമൊരു
ശയനപ്രദക്ഷിണവും.

2
സുപ്രഭാതസന്ദേശമയക്കുവാന്‍
വിട്ടുപോയി ഞാന്‍ ഇന്നെന്തുകൊണ്ടാവോ
എങ്കിലും നീ മറന്നില്ലുദിക്കുവാന്‍
എന്നത്തേതിലുമുച്ചം സമുജ്ജ്വലം!

3
കുത്തിവീഴ്ത്തിയോനൊപ്പം
അവസാനമായൊരു
സെല്‍ഫി സാധിച്ചില്ലല്ലോ;
ബാക്കിയാണൊരേ ദുഃഖം!
(അവനുമതേ ദു:ഖ-
മായിരിക്കട്ടേ ശിക്ഷ)

4
കുമ്പിടിയിലേക്കുള്ള
കുട്ടിബസിനറിയില്ലല്ലോ
തൃശൂര്‍ - കോഴിക്കോട് ലിമിറ്റഡ് സ്റ്റോപ്പിന്റെ
ഹൃദയവ്യഥ.

5
വണ്ടി വാങ്ങിപ്പിച്ച തൈവം
എണ്ണയടിക്കാനും വഴിതെളിക്കുമാറാകട്ടെ...

6
പച്ചവെള്ളത്തെ പെട്രോ-
ളാക്കി മാറ്റുവാന്‍, അവന്‍
എത്തിടുമൊരു നാളില്‍
ഇല്ല സംശയമേതും...

7
ഉറക്കം പിണങ്ങിപ്പോയെന്ന്
കുറുക്കന്‍ വിളിച്ചു കൂവുന്നു,
തനിച്ചായിപ്പോയ കുറുക്കന്‍.

8
ഉച്ചിയോളം മുങ്ങിയൊരു
മരത്തിന്‍ കൊമ്പാണ് കണ്ടു-
വെച്ചിരുന്നതൊരൂഞ്ഞാല് കെട്ടിയാടുവാന്‍

9
അപനിര്‍മ്മിച്ചു നോക്കീ 
പലവട്ടം ഉപ്പെന്ന വാക്ക്
രുചിക്കാനായില്ലൊരിക്കലു-
മതിന്റെ ലാവണ്യം.
ഉണ്ടെങ്കിലോ മധുരം മാത്രം
അതും കയ്പിന്റെ തരിയോളം.

10
നീയെന്താ വിളിച്ചാല്‍ മൈന്‍ഡ് ചെയ്യാത്തത്?
അതിന് നീയെന്നെ എപ്പോള്‍ ഫോണ്‍ വിളിച്ച്?
ഫോണല്ല വിളിച്ചത് 
പിന്നെ?
വിസില്‍!