'റീൽ ഇട്ടത് മാത്രമേ ഓർമയുള്ളൂ, ചീത്ത കമന്റ്സ് ഇട്ട എല്ലാവരുടെയും അമ്മയ്ക്കും അപ്പനും സുഖമാണെന്നു കരുതുന്നു'; മറുപടിയുമായി അന്ന രാജൻ

സോഷ്യൽ മീഡിയയിൽ വളരെ സജീവമായ നടിയാണ് അന്ന രേഷ്മ രാജൻ. താൻ പങ്കുവച്ച പുതിയ വിഡിയോയ്ക്ക് മോശം കമന്റ് പോസ്റ്റ് ചെയ്തവർക്ക് കടുത്ത മറുപടി തന്നെ നൽകിയിരിക്കുകയാണ് അന്ന. ‘‘ആകാംക്ഷയിൽ ഒരു റീൽ ഇട്ടത് മാത്രമേ ഓർമയുള്ളൂ. ചീത്ത കമന്റ്സ് ഇട്ട എല്ലാവരുടെയും അമ്മയ്ക്കും അപ്പനും സുഖമാണെന്നു കരുതുന്നു. നന്ദി എല്ലാവർക്കും.’’- എന്നാണ് അന്ന കുറിച്ചിരിക്കുന്നത്.

കടുത്ത അർജന്റീന ആരാധികയായ അന്ന ടീമിന്റെ ജഴ്സി അണിഞ്ഞുള്ള റീൽ വിഡിയോ സമൂഹ മാധ്യമങ്ങളിൽ പങ്കുവച്ചിരുന്നു. കൂടാതെ സബ്സ്ക്രിപ്ഷന്റെ ഭാഗമായുള്ള ഗ്ലാമർ റീലും പോസ്റ്റ് ചെയ്യുകയുണ്ടായി. വലിയ വിമർശനമാണ് ഈ രണ്ട് വിഡിയോയ്ക്കും നേരിടേണ്ടി വന്നത്. ഇതേ തുടർന്ന് കമന്റ് ബോക്സ് നടി നീക്കം ചെയ്തു.

അർജന്റീനയുടെ ജഴ്സി ധരിച്ചു കൊണ്ടുള്ള നിരവധി വിഡിയോകൾ അന്ന മുൻപും പോസ്റ്റ് ചെയ്തിട്ടുണ്ട്. ലിജോ ജോസ് പെല്ലിശ്ശേരി സംവിധാനം ചെയ്ത 'അങ്കമാലി ഡയറീസ്' എന്ന ചിത്രത്തിലൂടെയാണ് അന്ന രാജൻ അഭിനയരംഗത്തേക്ക് വന്നത്. ചിത്രത്തിലെ ലിച്ചി എന്ന അന്നയുടെ കഥാപാത്രം ഏറെ ശ്രദ്ധ നേടുകയും ചെയ്തിരുന്നു. അഭിനയത്തിന് പുറമേ ഉദ്ഘാടന വേദികളിലും അന്ന സജീവമാണ്.