'റെഡ് ഹിൽസ് കാർത്തികേയന്റെ' മാസ് എൻട്രി, മമ്മൂ‌ട്ടിയെ പൂ‌ട്ടാൻ ധനുഷും സായ് പല്ലവിയും, ആവേശം നിറച്ച് 'ഓം'

മമ്മൂട്ടിയും ധനുഷും ഒന്നിക്കുന്ന ബിഗ് ബജറ്റ് ചിത്രം ‘ഓം – ഓപ്പറേഷൻ മോൾ’ ട്രെയിലർ പുറത്തിറങ്ങി. ആക്ഷനും വൈകാരിക മുഹൂർത്തങ്ങളും ത്രില്ലിങ് രംഗങ്ങളും നിറഞ്ഞ ചിത്രത്തിന്റെ ട്രെയിലർ ഇതിനോടകം ശ്രദ്ധ നേടുകയാണ്. രാജ്കുമാർ പെരിയസാമി സംവിധാനം ചെയ്യുന്ന ചിത്രം നവംബർ 20ന് ആഗോളതലത്തിൽ തിയറ്ററുകളിലെത്തും.

കാടിന്റെ പശ്ചാത്തലത്തിൽ ചന്ദനക്കടത്തും അതുമായി ബന്ധപ്പെട്ട അധോലോക പ്രവർത്തനങ്ങളുമാണ് ചിത്രത്തിന്റെ പ്രമേയമെന്നാണ് ട്രെയിലർ നൽകുന്ന സൂചന. നിയമവും അധികാരവും അതിജീവനവും തമ്മിലുള്ള പോരാട്ടങ്ങളും ശക്തമായ സംഘർഷങ്ങളും ചിത്രത്തിലുണ്ടാകും. ആക്ഷൻ രംഗങ്ങൾക്കൊപ്പം കഥാപാത്രങ്ങളുടെ വൈകാരികമായ സംഘർഷങ്ങൾക്കും ചിത്രം പ്രാധാന്യം നൽകുന്നുണ്ട്.

റെഡ് ഹിൽസ് കാർത്തികേയൻ എന്ന കഥാപാത്രമായാണ് മമ്മൂട്ടി ചിത്രത്തിലെത്തുന്നത്. ധനുഷാണ് കേന്ദ്ര കഥാപാത്രത്തെ അവതരിപ്പിക്കുന്നത്. ഇരുവരും നേർക്കുനേർ എത്തുന്ന രംഗങ്ങളാണ് ട്രെയിലറിന്റെ പ്രധാന ആകർഷണം. വ്യത്യസ്ത തലമുറകളിലെ രണ്ട് മികച്ച അഭിനേതാക്കൾ ഒന്നിക്കുന്നതും ചിത്രത്തെക്കുറിച്ചുള്ള പ്രതീക്ഷകൾ വർധിപ്പിക്കുന്നുണ്ട്.

ഐപിഎസ് ഉദ്യോഗസ്ഥ നിത്യ റെഡ്ഡിയായാണ് സായ് പല്ലവി വേഷമിടുന്നത്. നിയമവിരുദ്ധമായ ചന്ദനക്കടത്ത് തടയാനുള്ള നിർണായക ദൗത്യത്തിന് നേതൃത്വം നൽകുന്ന കഥാപാത്രമാണ് നിത്യ. ട്രെയിലറിൽ സായ് പല്ലവിയുടെ ശക്തമായ സാന്നിധ്യവും ശ്രദ്ധ നേടുന്നുണ്ട്. ശ്രീലീല, നസിറുദ്ദീൻ ഷാ, ഇന്ദ്രൻസ് എന്നിവരും പ്രധാന വേഷങ്ങളിലെത്തുന്നു.

‘അമരൻ’ എന്ന സൂപ്പർഹിറ്റ് ചിത്രത്തിന് ശേഷം രാജ്കുമാർ പെരിയസാമി സംവിധാനം ചെയ്യുന്ന സിനിമയാണിത്. ‘മാരി 2’വിന് ശേഷം ധനുഷും സായ് പല്ലവിയും വീണ്ടും ഒന്നിക്കുന്നു എന്ന പ്രത്യേകതയുമുണ്ട്. സായ് അഭ്യങ്കറാണ് ചിത്രത്തിന്റെ സംഗീതം ഒരുക്കുന്നത്. ട്രെയിലറിലെ പശ്ചാത്തലസംഗീതവും ആക്ഷൻ രംഗങ്ങളുടെ തീവ്രത വർധിപ്പിക്കുന്നുണ്ട്.

ധനുഷിന്റെ വണ്ടർബാർ ഫിലിംസും ആർ ടേക്ക് സ്റ്റുഡിയോസും ചേർന്നാണ് ചിത്രം നിർമിക്കുന്നത്. തമിഴ്, തെലുങ്ക്, ഹിന്ദി ഭാഷകളിൽ ചിത്രം റിലീസ് ചെയ്യും. കേരളത്തിലെ വിതരണാവകാശം ബിനു ജോർജ് അലക്സാണ്ടർ പ്രൊഡക്ഷൻസ് സ്വന്തമാക്കിയിട്ടുണ്ട്. ഡ്രീം ബിഗ് ഫിലിംസാണ് കേരളത്തിലെ വിതരണ പങ്കാളികൾ. നവംബർ 20ന് ചിത്രം ആഗോളതലത്തിൽ തിയറ്ററുകളിലെത്തും.