

സംവിധായകൻ അമൽ നീരദിന്റെ ഏറ്റവും വലിയ ബലഹീനത സിനിമ തന്നെയാണെന്ന് അദ്ദേഹത്തിന്റെ ജീവിത പങ്കാളിയും നടിയുമായ ജ്യോതിർമയി. അമൽ നീരദ് സംവിധാനം ചെയ്യുന്ന പുതിയ ചിത്രം 'ബാച്ച്ലർ പാർട്ടി' ഡ്യൂവിന്റെ പ്രൊമോഷന്റെ ഭാഗമായി പോർട്രയൽസ് ബൈ ഗദ്ദാഫി എന്ന യൂട്യൂബ് ചാനലിൽ സംസാരിക്കുകയായിരുന്നു ജ്യോതിർമയി.
അമൽ നീരദിന്റെ മേക്കിങ് സ്റ്റൈലിനെക്കുറിച്ചും ജ്യോതിർമയി സംസാരിച്ചു. ഒരു സിനിമയ്ക്കായി തയ്യാറെടുക്കുമ്പോൾ തന്നെ ഓരോ ചെറിയ കഥാപാത്രത്തിന് പോലും അമൽ മനസിലൊരു സ്കെച്ച് ഇട്ടിട്ടുണ്ടാകുമെന്നും ജ്യോതിർമയി വ്യക്തമാക്കി. "ഒരു സിനിമയ്ക്കായി തയ്യാറെടുക്കുമ്പോൾ തന്നെ ഓരോ ചെറിയ കഥാപാത്രത്തിന് പോലും അമൽ മനസിലൊരു സ്കെച്ച് ഇട്ടിട്ടുണ്ടാകും.
ഇങ്ങനെയായിരിക്കും അവരുടെ രീതികൾ, മാനറിസം തുടങ്ങി ആ കഥാപാത്രത്തിന്റെ മൊത്തത്തിലുള്ള സ്റ്റൈൽ അമലിന്റെ മനസിൽ ഉണ്ടാകും. അതുകഴിഞ്ഞിട്ട് സ്റ്റൈലിസ്റ്റിനെ കൊണ്ടുവരും, ഓരോരുത്തർക്കും വേണ്ടി. അത് കുറച്ച് ദിവസത്തെ ഒരു പ്രോസസ് ആണ്. ഏത് കാരക്ടർ ഏത് അഭിനേതാവാണ് ചെയ്യുന്നതെന്ന് തീരുമാനമായി കഴിഞ്ഞാൽ, ഓരോ ആക്ടേഴ്സിനെയും വിളിച്ച് അവരുടെ ഹെയർ സ്റ്റൈൽ, കോസ്റ്റ്യൂം എല്ലാം നോക്കും.
പിന്നെ ഒരു ഫോട്ടോഷൂട്ട് ഉണ്ടാകും. അങ്ങനെയൊക്കെയാണ് പിന്നെ സിനിമയിലേക്ക് വരുന്നത്. കുറച്ച് ഹോം വർക്ക് ചെയ്യുന്നൊരു പ്രോസസ് ആണത്. ഈ സിനിമയിൽ നാദിയ മാമിന്റെ ലുക്കിന് വേണ്ടിയിട്ട് അമലിന്റെ കണ്ണട കൊടുത്തിട്ട്, അത് എങ്ങനെയുണ്ടെന്ന് നോക്കി. അത് ഓക്കെ ആണെന്ന് കണ്ടപ്പോൾ മാം പിന്നെ അത് തന്നെ വച്ചു.
സിനിമയിലേക്കിറങ്ങിയാൽ പിന്നെ അദ്ദേഹം എപ്പോഴും അതേക്കുറിച്ച് തന്നെയാണ് ചിന്തിക്കുന്നത്. അതിനെപ്പറ്റിയുള്ള ചർച്ചകളുമൊക്കെയായിരിക്കും. കഴിവതും ആ സമയത്ത് ബാക്കി കാര്യങ്ങളിൽ അദ്ദേഹം ഇടപെടാറില്ല. സിനിമ തന്നെയാണ് അദ്ദേഹത്തിന്റെ വീക്ക്നെസ്. വേറെ ഒന്നുമില്ല". - ജ്യോതിർമയി പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates