'പ്രിയപ്പെട്ട സുരേഷിന്...'; പിറന്നാൾ ആശംസകൾ നേർന്ന് മമ്മൂട്ടിയും മോഹൻലാലും

നടൻ സുരേഷ് ​ഗോപിയുടെ 67-ാം പിറന്നാൾ ആണിന്ന്. ആരാധകരും സഹപ്രവർത്തകരുമടക്കം നിരവധി പേരാണ് സുരേഷ് ​ഗോപിക്ക് ആശംസ അറിയിച്ചിരിക്കുന്നത്. നടൻമാരായ മോഹൻലാലും മമ്മൂട്ടിയും സുരേഷ് ​ഗോപിക്ക് പിറന്നാൾ ആശംസകൾ അറിയിച്ചിട്ടുണ്ട്. 'ജന്മദിനാശംസകൾ പ്രിയപ്പെട്ട സുരേഷ്, ഒരു മികച്ച വർഷം നിങ്ങൾക്ക് ആശംസിക്കുന്നു'- എന്നാണ് മമ്മൂട്ടി കുറിച്ചിരിക്കുന്നത്.

സുരേഷ് ​ഗോപിയുടെ ഒരു പഴയകാല ചിത്രവും മമ്മൂട്ടി പങ്കുവച്ചിട്ടുണ്ട്. 'ഒരുപാട് നന്ദി' എന്നാണ് മമ്മൂട്ടിയുടെ ആശംസയ്ക്ക് സുരേഷ് ​ഗോപി മറുപടിയായി കുറിച്ചിരിക്കുന്നത്. 'ജന്മദിനാശംസകൾ, പ്രിയപ്പെട്ട സുരേഷ് എന്ന് മോഹൻലാലും ആശംസിച്ചു. ഊഷ്മളതയും സന്തോഷവും നിറഞ്ഞ ഒരു ദിവസം ആശംസിക്കുന്നു.

കൂടാതെ മറ്റുള്ളവരിലേക്ക് നിങ്ങൾ കൊണ്ടുവരുന്ന ദയ, ശക്തി, പ്രകാശം എന്നിവ പ്രതിഫലിക്കുന്ന ഒരു വർഷവും നിങ്ങൾക്ക് ആശംസിക്കുന്നുവെന്നും'- മോഹൻലാൽ കുറിച്ചു. 'എന്റെ പ്രിയപ്പെട്ട ലാലിന് നന്ദി'- എന്ന് സുരേഷ് ​ഗോപിയും മറുപടി നൽകി.

നിലവിൽ ഒന്നിലേറെ ചിത്രങ്ങളുമായി തിരക്കിലാണ് സുരേഷ് ​ഗോപിയിപ്പോൾ. പ്രവീൺ നാരായണൻ തിരക്കഥയെഴുതി സംവിധാനം ചെയ്യുന്ന ജെഎസ്കെയാണ് റിലീസ് കാത്തിരിക്കുന്ന ചിത്രം. ഷിബിൻ ഫ്രാൻസിസിൻ്റെ തിരക്കഥയിൽ മാത്യൂസ് തോമസ് സംവിധാനംചെയ്യുന്ന ഒറ്റക്കൊമ്പൻ എന്ന ചിത്രമാണ് മറ്റൊന്ന്.

ഇതിന്റെ ചിത്രീകരണം പുരോ​ഗമിക്കുകയാണ്. ജെഎസ്കെ ഈ മാസം 27ന് റിലീസ് ചെയ്യാനിരിക്കുകയായിരുന്നു. എന്നാൽ ചിത്രത്തിന്റെ പേര് മാറ്റണമെന്ന് അറിയിച്ച് സെൻസർബോർ‌ഡ് എത്തിയതോടെ ജെഎസ്കെ റിലീസ് അനിശ്ചിതത്വത്തിലായിരിക്കുകയാണ്.