തന്റെ തന്നെ പേരിലുള്ള റെക്കോർഡുകൾ തിരുത്തി കുറിക്കുന്നത് മോഹൻലാലിനിപ്പോൾ ഒരു പതിവായി മാറിയിരിക്കുകയാണ്. മോഹൻലാലിന്റെ ഏറ്റവും പുതിയ ചിത്രമായ ദൃശ്യം 3 യുടെ കാര്യത്തിലും അതിൽ മാറ്റമൊന്നും വന്നിട്ടില്ല. മോഹൻലാലിന്റെ പിറന്നാൾ ദിനമായ ഇന്നലെയാണ് ലോകമെമ്പാടുമായി ദൃശ്യം 3 റിലീസിനെത്തിയത്.
ദൃശ്യം ഫ്രാഞ്ചൈസിയുടെ തന്നെ മൂന്നാം ഭാഗമായതിനാൽ വലിയ പ്രീ റിലീസ് ഹൈപ്പോടെയാണ് ചിത്രം തിയറ്ററുകളിലെത്തിയതും. ഇപ്പോഴിതാ ചിത്രത്തിന്റെ ആദ്യ ദിന ബോക്സ് ഓഫീസ് കളക്ഷൻ റിപ്പോർട്ടുകൾ പുറത്തുവന്നിരിക്കുകയാണ്.
പ്രമുഖ ഇൻഡസ്ട്രി ട്രാക്കർമാരായ സാക്നിൽക്കിന്റെ കണക്ക് പ്രകാരം ചിത്രം ഇന്ത്യയിൽ നിന്ന് ആദ്യ ദിനം നേടിയ ഗ്രോസ് 18.37 കോടിയും നെറ്റ് കളക്ഷൻ 15.85 കോടിയുമാണ്. വിദേശമാർക്കറ്റുകളിലും ചിത്രത്തിന് മികച്ച പ്രതികരണമാണ് ലഭിച്ചു കൊണ്ടിരിക്കുന്നത്.
30 കോടിക്കടുത്ത് കളക്ഷൻ നേടിയെന്നാണ് റിപ്പോർട്ടുകൾ. ആഗോള ബോക്സ് ഓഫീസില് നിന്ന് ആദ്യ ദിനം ചിത്രം 48.37 കോടി നേടിയതെന്നാണ് അവര് പറയുന്നത്. എന്നാല് ഇത് ആദ്യ കണക്കുകളാണ്. സിനിമയ്ക്ക് 50 കോടി കളക്ഷൻ ലഭിക്കാനാണ് സാധ്യതയെന്നും ചില റിപ്പോർട്ടുകൾ പറയുന്നു.
പ്രമുഖ ടിക്കറ്റ് ബുക്കിങ് പ്ലാറ്റ്ഫോം ആയ ബുക്ക് മൈ ഷോയിലൂടെ ആദ്യ ദിനം ഏറ്റവുമധികം ടിക്കറ്റുകള് വിറ്റ മലയാള ചിത്രം എന്ന റെക്കോര്ഡും ദൃശ്യം 3 സ്വന്തമാക്കി. മോഹന്ലാലിന്റെ തന്നെ തുടരും എന്ന ചിത്രത്തിന്റെ പേരിലുണ്ടായിരുന്ന റെക്കോര്ഡ് ആണ് ഇത്.
തുടരും റിലീസ് ദിനത്തില് 4.19 ലക്ഷം ടിക്കറ്റുകളാണ് വിറ്റിരുന്നതെങ്കില് ദൃശ്യം 3 അതിനെ മറികടന്ന് ബുക്ക് മൈ ഷോയിലൂടെ ഇന്നലെ വിറ്റത് 5.87 ലക്ഷം ടിക്കറ്റുകളാണ്. മൂന്നാം സ്ഥാനത്തും മറ്റൊരു മോഹന്ലാല് ചിത്രം തന്നെ. എമ്പുരാന് ആണ് അത്. 3.81 ലക്ഷം ടിക്കറ്റുകളാണ് എമ്പുരാന് ആദ്യ ദിനം വിറ്റിരുന്നത്.
കേരളത്തില് അഞ്ഞൂറില് അധികം ലേറ്റ് നൈറ്റ് ഷോകള് ദൃശ്യം 3യ്ക്ക് ഇന്നലെ നടന്നു എന്ന് ആശിർവാദ് സിനിമാസ് പുറത്തുവിട്ടിരുന്നു. വാരാന്ത്യം കൂടി ആയതിനാൽ മികച്ചൊരു സംഖ്യയിലേക്ക് തന്നെ വരും ദിവസങ്ങളിൽ ദൃശ്യം 3 എത്തുമെന്നാണ് വിവരം. 2013 ൽ പുറത്തുവന്ന ദൃശ്യം മലയാള സിനിമയുടെ മുഴുവൻ ബോക്സ് ഓഫീസ് റെക്കോർഡുകളെ ആണ് തകർത്തെറിഞ്ഞത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
