'ജോർജു കുട്ടി എന്തെങ്കിലും കുഴപ്പമുണ്ടാക്കും... പേടിക്കണ്ടാ'; ദൃശ്യം 3യെക്കുറിച്ച് മോഹൻലാൽ

മലയാള സിനിമയിൽ ബെ‍ഞ്ച്മാർക്കായി മാറിയ ചിത്രമാണ് ദൃശ്യം. ജീത്തു ജോസഫ്- മോഹൻലാൽ കൂട്ടുകെട്ടിലെത്തിയ ചിത്രത്തിന്റെ രണ്ട് ഭാ​ഗങ്ങളും തിയറ്ററുകളിൽ വൻ വിജയമായി മാറി. ഇപ്പോഴിതാ ദൃശ്യം 3യും ഒരുങ്ങുകയാണ്. ഇന്ന് പൂത്തോട്ട ലോ കോളജിൽ വച്ച് ചിത്രത്തിന്റെ പൂജ ചടങ്ങുകൾ നടന്നു.

ദൃശ്യം ഒന്നും രണ്ടും മനസിലേറ്റിയ പ്രേക്ഷകർ തീർച്ചയായും ദൃശ്യം 3യും മനസിൽ കൊണ്ടു നടക്കുമെന്ന് താൻ പ്രാർഥിക്കുന്നുവെന്ന് നടൻ മോഹൻലാൽ പറഞ്ഞു. ചിത്രത്തിന്റെ പൂജ ചടങ്ങുകൾക്കെത്തിയപ്പോൾ മാധ്യമങ്ങളോട് സംസാരിക്കുകയായിരുന്നു മോഹൻലാൽ.

"ദൃശ്യം 3യുടെ ചിത്രീകരണം ഇന്ന് തുടങ്ങുകയാണ്. എല്ലാ സിനിമകൾ തുടങ്ങുമ്പോഴും നമ്മൾ മനസ് കൊണ്ട് പ്രാർഥിക്കുന്നത്, ഈ സിനിമയ്ക്ക് ഒരു തടസവും കൂടാതെ ഷൂട്ടിങ് നടക്കണേ, ഈ സിനിമ ഏറ്റവും വലിയ സൂപ്പർ ഹിറ്റായി മാറണേ എന്നാണ്. അതുപോലെ ഞാനും പ്രാർ‌ഥിക്കുന്നു. ഒരു തടസവും കൂടാതെ നടക്കണേ.

ഇതൊരു വലിയ വിജയമായി മാറണേ എന്ന്. ദൃശ്യം ഒന്നും രണ്ടും മനസിലേറ്റിയ പ്രേക്ഷകർ തീർച്ചയായും ദൃശ്യം 3യും മനസിൽ കൊണ്ടു നടക്കുമെന്ന് ഞാൻ പ്രാർഥിക്കുന്നു. ജോർജു കുട്ടി എന്തെങ്കിലും കുഴപ്പമുണ്ടാക്കും, പേടിക്കണ്ടാ. ഈ ഒരു ആകാംക്ഷയാണ് ദൃശ്യത്തിന്റെ ക്യാച്ച് എന്ന് പറയുന്നത്". - മോഹൻലാൽ‌ പറഞ്ഞു.

അതേസമയം ഇന്ന് ഉച്ചയോടെ ദാദാ സാഹിബ് ഫാല്‍ക്കെ പുരസ്‌കാരം സ്വീകരിക്കാനായി മോഹൻലാൽ ഡൽഹിയിലേക്ക് പോകും. മൂന്നാം ഭാഗത്തിന്റെ ചിത്രീകരണം 55 ദിവസം കൊണ്ട് പൂർത്തിയാക്കാൻ ആണ് നിലവിലെ പ്ലാൻ.

ജോർജുകുട്ടി എന്ന കഥാപാത്രത്തിന് നാല് വർഷത്തിന് ശേഷമുണ്ടാകുന്ന മാറ്റങ്ങൾ ആണ് മൂന്നാം ഭാഗത്തിൽ കൊണ്ടുവരുന്നതെന്ന് ജീത്തു ജോസഫ് പറഞ്ഞിരുന്നു. ദൃശ്യം 3 ഒരു നല്ല സിനിമയാണെന്നും അമിത പ്രതീക്ഷയോടെ ആരും വരരുതെന്നും സംവിധായകൻ ജീത്തു ജോസഫ് പൂജ ചടങ്ങിൽ പറഞ്ഞിരുന്നു.