'മനഃപൂർവം അവർക്കിട്ടൊരു പണി കൊടുക്കണം എന്ന് വിചാരിച്ച് ജീവിതത്തിൽ ഞാനൊരു കാര്യവും ചെയ്തിട്ടില്ല'; പൃഥ്വിരാജ്

ഒരു വിഭാ​ഗത്തിനും പണി കൊടുക്കണമെന്ന് കരുതി ജീവിതത്തിലും സിനിമയിലും ഒന്നും ചെയ്തിട്ടില്ലെന്ന് നടൻ പൃഥ്വിരാജ്. എല്ലാ അഭിപ്രായത്തിനും വിലയുണ്ട്. പൃഥ്വിരാജ് എന്ന് പറയുന്നയാൾ ഒരു കഥാപാത്രമല്ല, ചില തീരുമാനങ്ങളും അഭിപ്രായങ്ങളും തന്നെയും ബാധിക്കുമെന്നും കൊച്ചിയിൽ മാധ്യമങ്ങളോട് പൃഥ്വിരാജ് പറഞ്ഞു.

"ഞാനങ്ങനെ എല്ലാവരെയും കൊണ്ട് എന്നെ ഇഷ്ടപ്പെടുത്താൻ ശ്രമിച്ചിട്ടില്ല. പക്ഷേ ഒരു കാര്യം എനിക്ക് അതിനേക്കാൾ ബോധ്യമുണ്ട്. ഞാൻ ഒരാളെയും ഒരു ചിന്തയെയും ഒരു വിഭാ​ഗത്തെയും ഒന്നും തന്നെ മനഃപൂർവം അവർക്കിട്ടൊരു പണി കൊടുക്കണം എന്ന് വിചാരിച്ച് ജീവിതത്തിൽ ഞാനൊരു കാര്യവും ചെയ്തിട്ടില്ല. എനിക്ക് എന്റേതായ ചെറിയൊരു ലോകമുണ്ട്.

അതിനകത്താണ് ഞാൻ ജീവിക്കുന്നത്. എന്റെ ചില ശരികൾ തെറ്റുകൾ അനുസരിച്ചാണ് ഞാൻ ജീവിക്കുന്നത്. എന്റെ ശരികളെല്ലാം ശരികളാണെന്ന് ഞാനൊരിക്കലും പറയില്ല. പക്ഷേ ഞാൻ അങ്ങനെയാണ് ജീവിക്കുന്നത്. എന്റെ അഭിമുഖങ്ങൾ കാണുമ്പോൾ ചില ആളുകൾ പറയുമായിരിക്കും, ഓ അയാളെന്ത് കാര്യമായിട്ടാ സംസാരിക്കുന്നത്, എന്തൊക്കെ കാര്യങ്ങളാ പറയുന്നത്.

മറ്റൊരു വിഭാ​ഗം പറയും ഇയാൾ വെറുതെ ഇതെന്താ ഈ പറഞ്ഞു കൊണ്ടിരിക്കുന്നേ എന്ന്. രണ്ടും ഓക്കെയാണ്". - പൃഥ്വിരാജ് പറഞ്ഞു. നിസാം ബഷീർ സംവിധാനം ചെയ്ത ഐ നോബഡി ആണ് പൃഥ്വിരാജിന്റേതായി ഒടുവിൽ തിയറ്ററുകളിലെത്തിയ ചിത്രം. സമ്മിശ്ര പ്രതികരണമാണ് ചിത്രത്തിന് ലഭിച്ചു കൊണ്ടിരിക്കുന്നത്. പാർവതി തിരുവോത്ത് ആണ് ചിത്രത്തിൽ നായികയായെത്തിയത്.