'എല്ലാ കുടുംബത്തിനും ഒരു ഹീറോ ഉണ്ടാകും! ഞങ്ങളുടെ ഹീറോയെ ഒരു വർഷം മുൻപ് നഷ്ടമായി'; കുറിപ്പുമായി കലാഭവൻ നവാസിന്റെ മകൻ

നടൻ കലാഭവൻ നവാസ് വിട പറഞ്ഞിട്ട് ഒരു വർഷം പിന്നിടുമ്പോൾ ഓർമകൾ പങ്കുവച്ച് അദ്ദേഹത്തിന്റെ മകൻ റിഹാൻ നവാസ്. "എല്ലാ കുടുംബത്തിനും ഒരു ഹീറോ ഉണ്ടാകും! ഒരു വർഷം മുൻപാണ് ഞങ്ങൾക്ക് ഞങ്ങളുടെ ഹീറോയെ നഷ്ടമായത്. അദ്ദേഹം കൺമറഞ്ഞു, പക്ഷേ ഞങ്ങളുടെ ഹൃദയങ്ങളിൽ എന്നെന്നേക്കുമായി ജീവിക്കുന്നു".-കുടുംബ ചിത്രം പങ്കുവച്ച് റിഹാൻ കുറിച്ചു.

നവാസ് പോയതോടെ തനിക്ക് തന്റെ വലംകൈ തന്നെയാണ് നഷ്ടപ്പെട്ടതെന്ന് നടനും നവാസിന്റെ സഹോദരനുമായ നിയാസും ഫെയ്സ്ബുക്കിൽ പങ്കുവച്ചിരുന്നു. 2025 ഓഗസ്റ്റ് ഒന്നിനായിരുന്നു ചോറ്റാനിക്കരയിലെ ഹോട്ടൽ മുറിയിൽ നവാസിനെ മരിച്ച നിലയിൽ കണ്ടെത്തിയത്.

‘പ്രകമ്പനം’ സിനിമയുടെ ചിത്രീകരണത്തിനിടെ നെഞ്ചുവേദന അനുഭവപ്പെടുകയും തുടർന്ന് ഹോട്ടൽ റൂമിൽ വിശ്രമിക്കുമ്പോൾ ഹൃദയാഘാതം സംഭവിക്കുകയുമായിരുന്നു. പ്രശസ്ത നാടക, ചലച്ചിത്ര നട‌നായിരുന്ന അബൂബക്കറിന്റെ മകനായി തൃശൂർ ജില്ലയിലെ വടക്കാഞ്ചേരിയിലാണ് നവാസ് ജനിച്ചത്.

മിമിക്രിയിലൂടെ കലാരംഗത്തെത്തി. കലാഭവനിൽ ചേർന്നതോടെയാണ് പ്രശസ്തിയിലേക്കുയർന്നത്. സഹോദരൻ നിയാസ് ബക്കറിനൊപ്പം കൊച്ചിൻ ആർട്സ് എന്ന മിമിക്രി ട്രൂപ്പ് രൂപീകരിച്ച് പരിപാടികൾ അവതരിപ്പിച്ചിരുന്നു.

1995ല്‍ ചൈതന്യം എന്ന ചിത്രത്തി‌‌ലൂടെയാണ് സിനിമയിൽ അരങ്ങേറിയത്. സിനിമകളിലും ടെലിവിഷൻ പരമ്പരകളിലും നായകനും സഹനടനുമായി ശ്രദ്ധേയ വേഷങ്ങൾ അവതരിപ്പിച്ചു. നടി രഹനയാണ് ഭാര്യ. നഹറിൻ, റിദ്‍വാൻ, റിഹാൻ എന്നീ മൂന്ന് മക്കളാണ് ദമ്പതികൾക്കുള്ളത്.