അയൽക്കാരൻ മൊബൈലുമായി ഇടവഴിയിലൂടെ നടക്കുമ്പോൾ കുരുമുളക് പറിക്കാൻ മതിലില്‍ കയറരുത്; ​ഗോവിന്ദ് പത്മസൂര്യ പഠിച്ച പാഠം

ലോക്ക്ഡൗണിനെ തുടർ‍ന്ന് പാട്ടാമ്പിയിലെ വീട്ടിലാണ് നടൻ ​ഗോവിന്ദ് പത്മസൂര്യ. അമ്മയെ അടുക്കളയിൽ സഹായിച്ചും പറമ്പിലെ ചില്ലറ ജോലികളുമായി സമയം തള്ളിനീക്കുകയാണ് താരം. അതിനിടയിലാണ് ജിപിയുടെ ഒരു ചിത്രം സോഷ്യൽ മീഡിയയിൽ വൈറലായത്. കാവി മുണ്ടും ബനിയനുമിട്ട് മതിലിന് മുകളിൽ കയറി മുരുമുളക് പറിക്കുന്ന ​ഗോവിന്ദ് പത്മസൂര്യയായിരുന്നു ചിത്രത്തിൽ. തുടർന്ന് താരത്തെ പുകഴ്ത്തി നിരവധിപേർ രം​ഗത്തെത്തി. 

എന്നാൽ ​ഗോവിന്ദ് പത്മസൂര്യയല്ല ചിത്രം സോഷ്യൽ മീഡിയയിൽ പങ്കുവെച്ചത്. താരത്തിന്റെ അയൽക്കാരനായ മുരളിച്ചേട്ടനാണ്. മതിലിൽ കയറി കുരുമുളകു പറിക്കുന്നതുകണ്ട മുരളിചേട്ടൻ ഫോട്ടോ എടുത്ത് ഫേയ്സ്ബുക്കിൽ പങ്കുവെക്കുകയായിരുന്നു. ഇതിൽ നിന്ന് താൻ പഠിച്ച ജീവിതപഠം എന്തെന്ന് പറയുകയാണ് താരം. ഇൻസ്റ്റ​ഗ്രാമിലൂടെയാണ് താരം ജീവിതപാഠത്തെക്കുറിച്ച് കുറിച്ചത്. 

ജീവിതം ചിലപ്പോഴൊക്കെ ഇങ്ങനെയാണ്. ഇതുപോലുള്ള സന്ദർഭങ്ങളാണ് നമ്മളെ ഗൗരവമേറിയ ജീവിതപാഠങ്ങൾ പഠിപ്പിക്കുന്നത്. ഞാൻ പഠിച്ച പാഠം: അയൽവാസി മുരളിയേട്ടൻ മൊബൈൽ കാമറയുമായി ഇടവഴിയിലൂടെ നടക്കുമ്പോൾ കുരുമുളക് പറിക്കാൻ മതിലിൽ കയറരുത്!- താരം കുറിച്ചു. എന്നാൽ പോസ്റ്റിന് താഴെ മുരളിയേട്ടനെ പുകഴ്ത്തിയും നന്ദി പറഞ്ഞും നിരവധി പേരാണ് എത്തുന്നത്. ജിപിയുടെ യഥാർത്ഥമുകം പുറത്തുകൊണ്ടുവന്നതിന് മുരളിയേട്ടന് നന്ദി എന്നാണ് കമന്റുകൾ. 

അല്ലു അർജുൻ നായകനായി എത്തിയ അങ്ങ് വൈകുണ്ഡപുരത്ത് എന്ന ചിത്രത്തിലൂടെ തെലുങ്കിലേക്ക് അരങ്ങേറ്റം കുറിച്ചിരിക്കുകയാണ് താരം.സൂപ്പർതാരത്തിന്റെ വില്ലനായി തിളങ്ങിയതോടെ താരത്തിന്റെ തെന്നിന്ത്യൻ ആരാധകരുടെ എണ്ണവും വർധിച്ചു.