ലൂസിഫറിലെ ഐറ്റം ​ഡാൻസ് വിഡിയോ പുറത്ത്; വാലൂച്ചയുടെ തകർപ്പൻ നൃത്തം കാണാം 

മോഹന്‍ലാല്‍ കേന്ദ്ര കഥാപാത്രമായെത്തിയ പൃഥ്വിരാജ് ചിത്രം ലൂസിഫറിലെ ഐറ്റം ഡാന്‍സ് വിഡിയോ പുറത്തുവിട്ടു. റഫ്ത്താര എന്ന് തുടങ്ങുന്ന ഐറ്റം സോങ്ങിൽ ഗോവന്‍ മോഡൽ വാലുച്ച ഡിസൂസയാണ് നൃത്തം ചുവടുവെച്ചിരിക്കുന്നത്. ഷാരൂഖ് ചിത്രം ''ഫാനി''ലുള്‍പ്പെടെ ഐറ്റം നമ്പര്‍ അവതരിപ്പിച്ച് പ്രശസ്തയാണ് വാലൂച്ച. ദീപക് ദേവ് സംഗീതം നല്‍കിയ ​ഗാനം ജ്യോത്സനയാണ് ആലപിച്ചത്. 

മികച്ച പ്രതികരണം നേടി ഇപ്പോഴും തീയേറ്ററുകളിൽ നിറഞ്ഞോടുകയാണ് ലൂസിഫർ. സ്റ്റീഫന്‍ നെടുംപള്ളി എന്ന രാഷ്ട്രീയപ്രവര്‍ത്തകന്റെ വേഷമാണ് മോഹൻലാൽ അവതരിപ്പിക്കുന്നത്.

ബോളിവുഡ് താരം വിവേക് ഒബ്റോയി ആണ് ചിത്രത്തിൽ വില്ലന്‍. മഞ്ജു വാര്യർ, ഇന്ദ്രജിത്ത്, ടൊവിനോ തുടങ്ങിയവർ പ്രധാനവേഷങ്ങളിലെത്തിയ ചിത്രത്തിൽ കലാഭവന്‍ ഷാജോണ്‍ മോഹന്‍ലാലിന്റെ സഹായിയായി അഭിനയിച്ചിട്ടുണ്ട്. സുജിത്ത് വാസുദേവാണ് ചിത്രത്തിന്റെ ഛായാഗ്രഹകൻ.